Romanuri 13

₁Ke sako manuš t'ašel tela le rai bare; ke sako putiaria avela katar o Del, ai le rai bare kai thode len o Del. ₂Sa anda kudia kudo kai ninkerel-pe pe le rai bare ninkerel-pe pe e poronka le Devleski kai vo thodias, ai kudala kai ninkeren pe len jekh strafo pe pende. ₃Nai pala jekh laši diela, si pe jekh nasul, ke le rai bare daran lendar. Kames tu te na daras katar o rai baro? Ker o mištimos, ai tut ažutila tu. ₄Ke vo kerel butji le Devleski te keres o mištimos. Numa te keresa o nasulimos, trubul te daras ke nai intaino ke si les e xanřo. O rai baro si sluga le Devleski pe tjiro mištimos. Numa te keresa tu nasul, dara; ke nai intaino ke vo si les e xanřo, si sluga le Devleski te kerel te pokjinen kudala kai keren o nasulimos. ₅Musai te ašes tela le bare, na ferdi daratar ke e xoli Devleski avel, numa vi pala tjiri godji.

₆Si vi pe kudia ke tume pokjinen love le themeske. Ke le rai bare si ministeri le Devleske sa thodine te keren pengi butji. ₇Den ka sako so si lesko: O pokjinimos kaske kames o pokjinimos, e dar kaske kames e dar, e pativ kaske tu kames e pativ.

₈Te na kames khanči khanikaske, te na avela ferdi te t'aven drago jekh avreske; ke kudo kai si leske drago le kaver kerel o Zakono. ₉Čačes, le poronki: Tu či keresa kurvetsia, tu či mudaresa, tu či čoresa, tu či rodesa te les so si avresko, ai si te aven aver poronki, si ande kadia vorba: T'avel tuke drago tjiro vortako sar san drago tuke. ₁₀O kamimos či kerel nasul khanikaske; o kamimos lašiarel o Zakono.

₁₁Kudia diela si bari ke tume žianen ande če vramia ame sam: Si o časo t'ušten anda e lindri, ke akana o skipimos si mai paše paša amende akana ke sar patiaiam pe e mai angluno data. ₁₂E riat la angle, o dies pašiol. Šiudas pa amende le butia la ratiake, ai thas pe amende le armi la vedariake. ₁₃Phiras ande o čačimos, sar ande o pherdo dies, dur katar o but xamos ai katar o but matimos, katar o lažiamos ai katar e kurvetsia, katar le čingaria ai katar e žaluzia. ₁₄Numa thon pe tumende sar tsalia o traio nevo ande o Jesus Kristo o Rai, ai na len sama katar o mas te kerel so vo kamel.