1Del kai keres te pokjinen, o Baro Del!
Del kai keres te pokjinen, o Baro Del!
2Ušti, de kris la phuvia!
De ka le barimatange sar si lenge butia!
3Ži kana le nasul, o Baro Del!
Ži kana le nasul nirina von?
4Von den duma, von den duma barimatansa;
Sa kudala kai keren o nasul vestin pe.
5Baro Del! von inčaren tjire narodos,
Von xasaren so si tjiro;
6Von šinen le kořa le phivliaki ai le streinonge,
Von mudaren le baiastrukon.
7Ai von phenen: O Baro Del či dikhel,
O Del anda o Jakob či lel sama!
8Len sama, le manuš prosti!
Prosti, kana avena tume godiaver?
9Kudo kai thodias o kan či ašunela vo?
Kudo kai kerdias e jakh či dikhela vo?
10Kudo kai mardias le themen či kereva vo te pokjinen,
Vo kai dias le manušes e godji?
11O Baro Del žianel le ginduri le manušeske
Vo žianel ke nai khančeske.
12Veselo o manuš kai tu mares o Baro Del!
Ai ke tu sikiares les katar tjiro zakono,
13Te ašiavel les ka le diesa nasulimaske,
Žikin ke e groapa t'avel hunadi le nasulenge!
14Ke o Baro Del či mukel peske narodos,
Vo či mukel so si lesko;
15Ke so phenesa avela vorta sar si e kris,
Ai sa kudala kai lengo ilo si vorta patiana.
16Kon uštela mange pe le nasul?
Kon ninkerela ma pe kudala kai keren nasul?
17Te na avilinosas o Baro Del t'ažutil ma,
Muřo duxo sas t'avel sigo ande o kher muto.
18Kana phenav: Muřo punřo perel!
Tjiro mištimos, o Baro Del! ninkerel ma.
19Kana le ginduria miškin pe ande muřo duxo,
Tjire vatimata veselin muřo duxo.
20Le nasul keren von te keres kris pe lengo skamin amperatisko,
Von kai si len ginduri bezexale makar ke si o zakono?
21Von kjiden-pe pe o traio kai si vorta,
Ai von keren te pokjinel o rat kai nai došalo.
22Muřo Del si o bař kai garadiovav.
23Vo kerela te perel pe lende lengi bezex,
Vo bilavela le pala lengo nasulimos;
O Baro Del, amaro Del, bilavela le.
