Psalmo 71

₁Baro Del! me rodav te garadiovav ande tute:

Ke šoha te na perav!

₂Ande tjiri kris, skipisar ma ai muk ma!

Bangiar karing mande tjiro kan, ai ažutisar ma!

₃Av mange jekh bař kai garavel ma,

Kai sakda šai lava sama!

Tu dian tu godji te skipis ma

Ke tu san muřo bař ai muřo armia.

₄Muřo Del, skipisar ma katar o vast le nasulesko,

Katar o vast le nasulesko ai zuralesko!

₅Ke tu san ande kaste ažiukerav, Bario Baro Del!

Ande tute dav ma de katar muřo ternimos.

₆De anda o peř muřa dako me ninkerav ma pe tute;

Tu ankaladias ma anda o peř la dako;

Tu san sakda kudo kai me luvudiv.

₇Me sim butenge sar jekh vestime,

Ai tu, tu san muřo zuralo armia kai garadiovav,

₈Ke muřo mui t'avel pherdo tjire luvudimata,

Ke sako dies vo te luvudil tu!

₉Na šiude ma ande e vramia le phurimaski;

Kana muře zora žiantar, na muk ma!

₁₀Ke muře dušmaia den duma pa mande,

Ai kudala kai kamen te len muřo traio pušen jekh avrestar,

₁₁Phenen: O Del muklias les;

Našen, len les; nai khonik te skipil les.

₁₂O Del, na žia dur mandar!

Muřo Del, av sigo t'ažutis ma!

₁₃Ke t'aven von tele, phařade, kudala kai kamen muřo traio!

Ke t'aven pherde lažiav ai šiudine, kudala kai kamen te xasaren ma!

₁₄Ai me, ažiukerava sakda,

Me luvudiva tut but ai mai but.

₁₅Muřo mui phenela tjiri kris,

Tjiro skipimos, sako dies,

Ke či žianav ži kai si le gora.

₁₆Me phenava sar si tjire butia zurale,

Muřo Baro Del!

Me mai phenava tjiri kris, ferdi tjiri.

₁₇O Del! tu sikiardian ma de terniara,

Ai ži akana me phenav tjire šukarimata.

₁₈Na muk ma, o Del! či ande o parno phurimos,

Eta te phenav tjiri zor ka e vitsa akana,

Tjiri zor ka e vitsa kai avela!

₁₉Tjiri kris, o Del! aresel ži ka o čeri;

Tu kerdian bare dieli:

O Del! Kon si sar tute?

₂₀Tu dian ame but nekazuri ai nasulimata;

Numa tu mai desa ame o traio,

Tu ankalavesa ame anda le uni la phuviake.

₂₁Vazde muřo barimos,

Mai risgisar ma!

₂₂Ai me luvudiva tut pe o bašimos la tsiturako,

Me gjilabava tjiro čačimos, muřo Del,

Me vestiva tut la lutasa, svinto anda o Israel!

₂₃Kana vestiva tu, avela ma veselia pe le vuš,

E veselia ande muřo duxo kai tu skipisardian;

₂₄Muři šib sako dies phenela tjiri kris,

Ke kudala kai roden te xasavav si lažiavarde ai xasarde.