Psalmo 44

₂O Del! ame ašundiam amare kanensa,

Amare dada phende amenge

Le butia kai tu kerdian ande lengi vramia,

Ka le diesa angla savořende.

₃Anda tjiro vast tu tradian thema te thos le ande lengo than,

Tu mardian narodon te putiares len.

₄Ke nai katar lenge xanře ke von line o them,

Nai lengo vast kai skipisardias le;

Numa si tjiro čačo, si tjiro vast,

Si e vedaria tjira fatsaki,

Ke tu kamesas le.

₅O Del! tu san amperato;

De ordina te skipil o Jakob!

₆Tusa ame dasa muial amare dušmanon,

Tjire anavesa ame inčarasa kudalen kai maren-pe pe amende.

₇Ke nai ande muři sulitsa kai man si patiamos,

Nai muři xanřo kai skipila ma;

₈Numa tu san kai skipisares ame katar amare dušmaia,

Ai kai peraves kudalen kai vuřitsin ame.

₉Ame vestisaras ande o Del sako dies,

Ai ame vestisaras sakda lesko anav.

₁₀Numa tu des ame palpale, tu pheres ame lažiav,

Tu či mai ankles amaria armiasa;

₁₁Tu keres te das palpale angla amare dušmaia,

Ai kudala kai vuřitsin ame len pa amende.

₁₂Tu des ame sar bakriořa te xan le,

Tu phařaves ame maškar le thema.

₁₃Tu bikjines tjire narodos pe khanči,

Tu gindis tu ke nai jekh baro kuč.

₁₄Tu keres anda amende jekh lažiav amare vortačonge

Prasaimos ai asaimos kudalenge kai si krugom amendar;

₁₅Tu keres anda amende jekh diela prasaimaski maškar le thema,

Ai te miškin o šero maškar le naroduni,

₁₆Muřo lažiav si sakda angla mande,

Ai o lažiavarimos garavel muřo mui,

₁₇Ka o hango kudalesko kai prasal ma ai del ma pe o lažiav,

Kai dikhav le dušmanos ai kai marel mui.

₁₈Sa kado avilo pe amende, bi ame te bustras tu,

Bi ame te šindiam tjiri patia:

₁₉Amaro ilo či dias pe rigate,

Amare pasuri či durile katar tjiri vurma,

₂₀Ke te tu inčares ame kai bešen le šakaluri,

Ai ke tu thos pe amende o ušialin le merimaski.

₂₁T'ame busterdiamas o anav amare Devlesko,

Ai te thodiamas amare vast karing jekh del streino,

₂₂O Del či nas te žianel vo,

Vo kai žianel so si garado ande o ilo?

₂₃Numa si pala tute ke šinen amare koř sako dies,

Kai dikhen pe amende sar pe le bakriořa kai ningeren le ka o masari.

₂₄Ušti! Sostar soves, Baria?

Ušti! na šiude ame pe sakda!

₂₅Sostar garaves tu tjiri fatsa?

Sostar bustres tu amaro nekazo ai amaro pharimos?

₂₆Ke amaro duxo si mardo ande e kišai,

Amaro stato si astardo ka e phuv.

₂₇Ušti, t'ažutisares ame!

Skipisar ame pala tjiro lašimos!