1Ka o birevo kudalengo kai gjilaben. Le tsiturensa kai si len struni. Psalmo le Davidoske.
2Kana tsipiv, de ma anglal, muřo Del ande kaste me patiav ma!
Kana sim ande o nekazo, skipisar ma!
T'avel tuke mila mandar, ašun muřo řudjimos!
3Šiave katar le manuš, ži kana muřo vestimos avela vo o lažiav?
Ži kana avela tumenge drago o khanči,
Rodena tume o xoxaimos?
4Te žianen ke o Baro Del alosardias peske jekhe manušes kai patial;
O Baro Del ašunel, kana tsipiv pe leste.
5Daran, ai na mai keren bezexa;
Den duma ka tumare ile pe tumaro than, porme ašen.
6Den sakrifisuri anda o ilo,
Ai den tume ande o vast le Bare Devlesko.
7But phenen: Kon dela amenge o mištimos?
Muk strefial pe amende e vedaria tjira fatsaki, o Baro Del!
8Tu thos ande muřo ilo mai but veselia sar si len
Kana kjiden pengo gjiv ai pengo struguro.
9Me sovav ai me uštiav patiasa,
Ke tu ferdi, o Baro Del! tu les sama mandar ande muřo kher.
