Psalmo 147

₁Luvudin le Bare Devles!

Ke si drago te vestin amare Devles,

Ke si guglo, si mišto te luvudin les.

₂O Baro Del mai vazdias o Jerusalem,

Vo kjidias kudalen kai geletar ande o Israel;

₃Vo sastiarel kudalen kai si lengo ilo šindo,

Ai vo phandel leske řani.

₄Vo gjinel sodi si le čeřaia,

Vo del savořen anava.

₅Amaro Baro si baro, zuralo katar peski zor,

Leski godji nai la gor.

₆O Baro Del ninkerel le čořen,

Vo teliarel le nasul ži ka e phuv.

₇Gjilaben le Bare Devleske šukarimasa.

Vestin amare Devles la tsiturasa!

₈Vo pherel le čeri le nuveronsa,

Vo lašiarel o brišin la phuviake;

Vo kerel te patiol e čar pe le plaia.

₉Vo del o xamos ka e žigania

Le kurungake tsinoře kana tsipin.

₁₀Nai ke ande e zor le grasteski ke lel pe sama,

Nai ande le čanga le manušeske kai thol pesko dragomos;

₁₁O Baro Del kamel kudalen kai daran lestar,

Kudala kai ažiukeren ande lesko mištimos.

₁₂Jerusalem, vestisar le Bare Devles!

Sion, luvudisar tjire Devles!

₁₃Ke vo ninkerel le belia katar tjire vudara,

Vo svintsol tjire šiaven maškar tute;

₁₄Vo thol e patia pe tjiri phuv;

Vo pravarel tu anda o mai lašio xamos.

₁₅Vo tradel peski ordini pe e phuv:

Leski vorba žial sigo.

₁₆Vo del o iv sar e pošom,

Vo thol o pavamos parno sar e pulberia;

₁₇Vo šiudel pesko pavo kotorensa;

Kon šai ninkerel angla lesko šil?

₁₈Vo tradel peski vorba, ai voi bilavel les;

Vo phurdel peski balval, ai le paia pitian.

₁₉Vo sikavel peski vorba ka o Jakob,

Peske zakonuri ai peske ordini ka o Israel;

₂₀Vo či jekh fialo sa le themenge,

Ai von či žianenas leske ordini.

Luvudin le Bare Devles!