1Psalmo le Davidoske.
Baro Del, me akharav tu: Aidi sigo paša mande!
Tho o kan ka muřo hango, kana akharav tu!
2Ke muřo řudjimos t'avel angla tjiri fatsa sar e tumuia,
Ai o vazdimos muře vastengo sar o dinimos la riatako!
3Baro Del, tho jekh t'arakhel muřo mui,
Le sama katar o vudar muře vuštengo!
4Na ninger muřo ilo ka le dieli nasul
Le dielensa došale le manušensa kai keren nasul,
Ai ke te na žiav ande lenge pativa!
5Ke o vorta te malavel ma, si jekh drago;
Ke te marel ma, si vuloi pe muřo šero:
Muřo šero či dela pe palpale;
Numa mai nevo muřo řudjimos uštel pe le nasul.
6Ke lenge krisinitoria t'aven šiudine pa o lungo le bařengo,
Ai ašunena muře vorbi, ke von si drago.
7Sar kai bariaren ai kai phařaven e phuv,
Kadia amare kokala si šiudine angla kai bešen le mule.
8Si karing tute, Baro Del, Baria! kai ambolden pe muře jakha,
Si paša tute kai rodav jekh kai te garadiovav:
9Le sama mandar katar e kletka kai von thon mange,
Ai katar le garaimata kudalendar kai keren nasul!
10Ke le nasul peren ande penge kletki,
Ai ke me te skipiv ma ande jekh vramia!
