Psalmo 102

₂Baro Del, ašun muřo řudjimos,

Ai ke muřo tsipimos t'aresel ži tute!

₃Na garav mandar tjiri fatsa o dies kai si ma o nekazo!

Bangiar karing mande tjiro kan kana me tsipiv!

Gribisavo ta ker pe muři!

₄Ke muře diesa bilan ande o thuv,

Ai muři kokala phabon sar jekh boi phabardo.

₅Muřo ilo malado ai šukiol sar e čar;

Bustrav inke te xav muřo manřo.

₆Muře vatimata si kadia

Ke muře kokala peren katar muřo mas.

₇Me maziovav pe o pelikano anda e pusta,

Me sim sar e čirikli muli kai tsipil anda o phařaimos;

₈Manai ma lindri, ai me sim

Sar jekh čirikli korkoro pe jekh čardako.

₉Sako dies muře dušmaia den ma pe o lažiav,

Ai pe mande solaxan muře dušmaia kana si xoliariko.

₁₀Me xav e kišai ande o than le manřesko,

Ai me hulavav muře asva ande muřo pimos,

₁₁Pala tjiri xoli ai pala tjiro baio;

Ke tu vazdian ma ai šiudian ma dur.

₁₂Muře diesa si sar e ušialin kai perel tele,

Ai me šiudiav sar e čar.

₁₃Numa tu, Baro Del! tu amperetsis pe sakda,

Ai tjiro gindo žial vitsa vitsatar.

₁₄Tu uštiavesa les, tuke avela mila anda o Sion;

Ke e vramia t'avel mila latar,

E vramia thodini aresli;

₁₅Ke tjire služi, kamen le bař,

Lenge drago e kišai.

₁₆Atunči le thema darana katar o anav le Bare Devlesko,

Ai sa le amperatsi la phuviake katar tjiro vestimos.

₁₇E, o Baro Del vazdela o Sion,

Vo sikadiola ande pesko vestimos.

₁₈Vo lel sama katar o řudjimos le čořesko

Vo či del palpale lesko řudjimos.

₁₉Ke kado t'avel ramome la vitsake kai avela,

Ai ke o narodo kai avela kerdo te vestil le Bare Devles!

₂₀Ke vo dikhel pa o than opral kai si lesko svintsimos;

Opral anda le čeri o Baro Del dikhel pe e phuv,

₂₁T'ašunel le vatimata le phanglenge,

Te skipil kudalen kai si te xasavon,

₂₂Eta te phenen ande o Sion o anav le Bare Devlesko,

Ai lesko luvudimos ande o Jerusalem,

₂₃Kana sa le naroduri kjidena pe,

Ai sa le thema, te služin le Bare Devles.

₂₄Vo phaglias muři zor pe o drom,

Vo xantsiardas muře diesa.

₂₅Me phenav: Muřo Del, na le ma ke inke sim terno diesengo,

Tu, kaske le berša žian pe sakda!

₂₆Tu de dumult thodian e phuv,

Ai le čeri si e butji tjire vastengi.

₂₇Von xasavona, numa tu bešesa;

Von rimona pe sa sar jekh tsolo;

Tu pařuvesa le sar jekh tsalia.

₂₈Numa tu, tu bešes jekh fialo,

Ai tjire berša či getona pe.

₂₉Le šiave tjire slugenge bešena ande o them pengo,

Ai lengi vitsa zuriavola angla tute.