Matei 27

₁Sar o diminiats avilo, sa le bare raša ai le purane le narodoske kjidine pe te den pe duma pe o Jesus, te mudaren les. ₂Pala ke phangle les von andine les ai dine les ka o Pontius Pilato, o vladoro.

₃Atunči o Juda, kai bikjindias les, dikhlias ke dine les kris, keisailo, vo ningerdias le trianda kotora rup ka le bare raša ai ka le purane. ₄Phenelas: Me kerdem bezex, kai dem ande tumare vast jekhe manušes kai nas došalo te merel.

Von den palpale: So-i amare dieli? Kudia si tjiri diela.

₅O Juda šiudias le love rupune ande o templo, ai gelo-tar te amblavel pe.

₆Le bare raša kjidine le, ai phenen: Nai slobodo te thon le love ande o mandjin šinado, ke si o bikjinimos le ratesko.

₇Ai, pala ke den pe duma, kjindine kudale lovensa o kimpo kudalesko kai kerel le khore. ₈Sa anda kudia kudo kimpo akharde les o kimpo le Ratesko, ži adies. ₉Atunči areslo so sas phendo katar o Jeremia, o profeto: Von line le trianda kotora rupune, love kai le Židovuri sas ande jekh than te pokjinen leske: ₁₀Ai von dine le te kjinen o kimpo kudalesko kai kerel le khore sar o Baro dias ma e ordina.

₁₁O Jesus andine les angla o vladoro. O vladoro pušel les, kadia: San tu o amperato le Židovongo?

O Jesus del les palpale: Tu phenes.

₁₂Numa či mai del palpale khanči so thon beda pe leste ka le raša le bare ai ka le purane. ₁₃Atunči o Pilato phenel leske: Či ašunes sode thon beda pe tute?

₁₄Ai o Jesus či del les palpale pe či jekh vorba, kudia sas šodo le vladoroske.

₁₅Ka sako Patradi, o vladoro sas sikado te mukel jekhe řobos, savo mangel o narodo. ₁₆Sas len atunči jekh řobaš vestime, bušol Barabas. ₁₇Sar von sas kjidine, o Pilato phenel lenge: Savo kamen tume te mukav les tumenge, le Barabas, vai le Jesus, kai akharen les o Kristo?

₁₈O Pilato vo žianelas mišto ke von dine les ande le vast le Jesus ke von sas xoliariko pe leste.

₁₉Žikin vo bešel ka e kris, leski řomni tradias te phenen leske: Te na avel khanči maškar tute ai kudo bi-došalo, ke adies but kjinuisardem ande o suno pala leste.

₂₀Le bare raša ai le purane thode zor pe o narodo te mangel te mukel le Barabas, ai te mudarel le Jesus. ₂₁O vladoro, lias e vorba, phenel lenge: Savo anda le dui kamen tume te mukav les tumenge?

Von den palpale: O Barabas.

₂₂O Pilato phenel lenge: So kerava me anda o Jesus, kai akharen les o Kristo?

Sa dine palpale: T'avel amblado pe o trušul! ₂₃O vladoro phenel: Numa če nasulimos kerdias vo?

Ai von tsipisarde mai zurales: T'avel amblado! ₂₄O Pilato dikhlias ke či niril khanči, numa ke o buntuimos butiol, lias pai, xaladias peske vast angla o narodo, ai phenel: Me či sim došalo anda o rat kadalesko. Tumari diela si.

₂₅Ai sa o narodo dias palpale: Ke te lesko rat perel pe amende ai pe amare šiave!

₂₆Atunči o Pilato muklias lenge le Barabas; ai, thodias te maren le Jesus, vo dias les t'amblaven les pe o trušul.

₂₇Le ketani le vladoroske ningerde le Jesus ande e avlin le vladoroski, ai von kjidine krugom lestar sa le kavre ketanen. ₂₈Line pa leste leske tsalia, ai thode pe leste jekh bunda loli. ₂₉Von khuvde jekh kurona anda le kanře, kai von thode pe lesko šero, ai von thode jekh řaioři ande lesko vast čačo; porme dine čanga angla leste, von prasan les, phenen: Unpači, amperato le Židovongo.

₃₀Ai von čungarden pe leste, line e řaioři, ai malade les pe o šero. ₃₁Pala kudia kai asaile lestar, line pa leste e bunda, thode pe leste leske tsalia, ai ningerde les t'amblaven les pe o trušul.

₃₂Kana ankliste avri, von arakhle jekhe manušes anda e Sirena, akharen les o Simon, ai von thode pe leste zor te ningerel o trušul le Jesusosko. ₃₃Aresle ande o than kai bušol Golgota, kudo si Šero Nango, ₃₄Von dine les te pel mol drabesa hamime; numa, kana vo zumadias, či kamlias te pel.

₃₅Kana amblade les pe o trušul von hulade leske tsalia, ai khelde pe kon lel le. ₃₆Porme von bešle tele, ai len sama lestar. ₃₇Te sikaven sostar sas vo dino strafo, ramosarde opral pa lesko šero: Kado si o Jesus, o amperato le Židovongo. ₃₈Lesa sas amblade dui čor, jekh pe leski čači, ai o kaver pe leski stingo.

₃₉Kai nakhenas maren mui lestar, ai miškinas o šero. ₄₀Phenenas: Tu kai phařaves o templo, ai kai vazdes les ande le trin dies, skipisavo tu! Te san tu o Šiav le Devlesko, vuli pa o trušul!

₄₁Le bare raša, le zakonarensa ai le puranensa, vi von asanas lestar, ai phenenas: ₄₂Vo skipisardias le kavren, ai vo naštil te skipil pe pes! Te si vo o amperato le Židovongo, ke te vulel pa pesko trušul, ai ame patiasa ande leste. ₄₃Vo dias pe ka o Del; ke o Del te skipil les akana, te kamela les. Ke vo phendias: Me sim o Šiav le Devlesko.

₄₄Le čor, amblade lesa, prasan les sa kadia.

₄₅De katar mismeri ži ka o trito časo, sas tuniariko pe sa e phuv. ₄₆Ai karing o trito časo, o Jesus tsipisardias jekhe hangosa zurale: Eloi, Eloi, lama sabaxthani? si kudia: Muřo Del, muřo Del, sostar muklian ma tu?

₄₇Uni anda kudala kai sas kothe, ašunde leste, phenenas: Vo akharel le Elia.

₄₈Ai strazo jekh anda lende našlo te lel jekh dirza, kai pherdias la šut ai, phanglias la pe jekh kaštořo, dias les te pel. ₄₉Numa le kaver phenen: Te dikhas te o Elia avela te skipil les.

₅₀O Jesus mai tsipisardias jekh data jekh hangosa zurale, ai gelotar lesko duxo.

₅₁Ai eta, e zanaveska ande o templo šindili ande donde, de opral ži tele, e phuv isdraias, le stanki phařadile. ₅₂Le groapoševuri puterdile, ai uni staturi le svintsonge kai sas mule živindisaile. ₅₃Ankliste avri anda le groapoševuri, von gele ande o foro svinto, ai sikadile ka but žene.

₅₄O fitsiri kai si baro pe jekh šel ketani ai kudala kai sas lesa t'arakhen le Jesus dikhle ke isdral e phuv ai so areslias, lias len jekh bari dar, ai phenenas: Čačes, kado manuš sas o Šiav le Devlesko. ₅₅Sas kothe but žiuvlia kai dikhenas de dural; von gele pala o Jesus de anda e Galilea te služin les. ₅₆Maškar lende sas e Maria anda e Magdala, e Maria, e dei katar o Jakob ai katar o Josef, ai e dei le šiavengi katar o Zebedeo.

₅₇E riat aresli, avilo jekh manuš barvalo anda o Arimate, bušol Josef, vi vo sas vortako katar o Jesus. ₅₈Vo gelo karing o Pilato, ai manglias o stato le Jesusosko. O Pilato dias ordina te den les leske. ₅₉O Josef lias o stato, phanglias les ande jekh paplano parno, ₆₀ai thodias les ande pesko groapoševo nevo, kai sas hunado ande jekh stanka. Porme spidias jekh baro bař angla o groapoševo, ai gelotar. ₆₁E Maria anda e Magdala, ai e kaver Maria sas kothe, bešenas angla o groapoševo.

₆₂Teharin, kai sas o sabato, le bare raša ai le Farizianuri gele ande jekh than paša o Pilato, ₆₃ai phenen: Baria, ame diam ame godji ke kudo xoxamno phendiasas, kana vo mai trailas: Trin dies pala kudia me živindiva. ₆₄De ordina ke o groapoševo t'avel arakhado ži ka o trito dies, eta ke te na leske vortača t'aven te čoren lesko stato, ai te phenen le narodoske: Vo živindisailo anda le mule. Kudo xoxaimos avela mai baro sar le mai angluno.

₆₅O Pilato phenel lenge: Tumen si tume kai arakhen, arakhen les sar tume kamen.

₆₆Von gele te len sama katar o groapoševo. Astarde o bař kai phandavenas anglal ai thode le ketanen te arakhen les.