Lukas 9

₁O Jesus, kjidias le deš-u-don, dias len zor ai putiaria pe sa le duxuri nasul, la zorasa te sastiaren le nasvalen. ₂Vo tradias len te phenen e amperetsia le Devleski, ai te sastiaren le nasvalen.

₃Na len khanči pe o drom, phenel lenge vo, či rovli, či gono, či manřo, či love, ai te na aven tumen dui bundi. ₄Ande varesavo kher kai tume den andre, bešen kothe; ai kothar tume žiantar. ₅Ai, te le žene či primina tumen, anklen avri anda kudo foro, ai khosen e pulberia pa tumare punře, t'aven martururi pe lende.

₆Von geletar, ai von gele gav gavestar, phenen e laši viasta ai keren kai-godi sastimata.

₇O Herodo o vladoro ašundias sa sogodi sas, ai či žianelas so te gindil. Ke uni phenenas ke o Jono živindisailo katar le mule; ₈kaver, ke o Elia sikadilo; ai mai kaver, ke jekh anda le purane profeturi živindisailo.

₉Numa o Herodo phenelas:

Me šindem e koř le Jonoski; kon si kado, kai ašunav pa leste kasave dieli? Ai vo rodelas te dikhel les.

₁₀Le apostoli, avile palpale, phenen le Jesusoske sa sogodi von kerde. Vo lias len pesa, ai gelo rigate, karing jekh foro akharen les Betsaida. ₁₁O narodo, dias pe o gor, gelo pala leste. O Jesus ažiukerdias le, ai del duma lensa pa e amperetsia le Devleski; vo mai sastiarelas sa kudalen kai trubunas t'aven saste.

₁₂Sar o dies lelas pe te vulel le deš-u-dui pašile, ai phenen leske:

Trade o narodo, eta te žian ande le gava ai ande le kimpuri krugom, te soven ai te arakhen so te xan; ke ame sam kathe ande jekh than pusto.

₁₃O Jesus phenel lenge:

Den le tume te xan.

Numa von dine les palpale:

Amen si ame ferdi panž manře ai dui maše. Te na žias ame te kjinas te xan sa kadale narodoske?

₁₄Eta, sas pašte panž mii manuš. O Jesus phenel peske vortakonge:

Keren te bešen tele řindo pa panž-var-deš.

₁₅Von kerde kadia, von kerde te bešen sa tele. ₁₆O Jesus lias le panž manře ai le dui maše, ai, vazdias le jakha karing o čeri, vo svintsisardias len. Porme phaglias le, ai dias le ka le vortača, eta te den le ka o narodo. ₁₇Sa xale ai pravardile, ai andine palpale deš-u-dui košnitsi pherde kotora kai ašile.

₁₈Jekh dies kai o Jesus řudjilas rigate, sas lesa leske vortača, vo pušel lendar kadia:

So phenen o narodo ke me sim?

₁₉Von den palpale:

O Jono kai boldias; kaver phenen: O Elia; mai kaver, ke jekh anda le purane profeturi živindisailo.

₂₀Ai tume, pušel le vo, so phenen tume ke me sim?

O Petri del palpale:

O Kristo le Devlesko.

₂₁O Jesus del len poronka zurales te na phenen khanikaske.

₂₂Vo mai phenel ke trubul ke o Šiav le manušesko kjinuila but, ke avela šiudino katar le phure, katar le bare raša ai katar le zakonaria, ke avela mudardo, ai ke živindila o trito dies.

₂₃Porme phenel savořenge:

Te kamela varekon t'avel pala mande, te bustrel pe vo, te lel sako dies pe peste pesko trušul, ai t'avel pala mande. ₂₄Ke kudo kai kamela te skipil pesko traio xasarela les, numa kudo kai xasarela les pala mande skipila les. ₂₅Ai so avela jekhe manušeske te niril sa e lumia, numa rimola pe vai xasavola peske? ₂₆Ke kon-godi avela leske lažiav mandar ai katar muře vorbi, o Šiav le manušesko avela leske lažiav lestar, kana avela ande pesko vestimos, ai ande o vestimos le Dadesko ai leske svintsi andželongo. ₂₇Me phenav tumenge čačimasa, uni anda kadala kai si kathe či merena te na dikhena e amperetsia le Devleski.

₂₈Pašte deš dies pala kai phendias kadala vorbi, o Jesus lias pesa le Petri, le Jono ai le Jakob, ai vo anklisto pe o plai te řudjil. ₂₉Žikin vo řudjil, lesko mui pařudisailo, ai lesko tsolo areslo pria parno ai strefialas. ₃₀Ai eta, dui manuš den duma lesa: sas o Moše ai o Elia, ₃₁kai, sikadionas ande pengo vestimos, denas duma ke žialtar, ai so si te avel ande o Jerusalem. ₃₂O Petri ai leske vortača sas lenge pharo katar e lindri; numa kana uštiade, von dikhle o vestimos le Jesusosko ai le do manušengo kai sas lesa.

₃₃Ande e vramia kai kudala manuš žiantar katar o Jesus, o Petri phenel leske:

Mišto ke ame sam kathe; vazdas trin tseři, jekh tuke, jekh le Mošeske, ai jekh le Eliaske. Vo či žianelas so phenelas.

₃₄Sar vo delas duma kadia, jekh nuvero avilo te garaven le; ai le vortača lias len e dar kai dikhle ke dine andre ande o nuvero. ₃₅Ai anda o nuvero anklisto jekh hango, kai phenel:

Kado si muřo Šiav alome, ašunen leste!

₃₆Kana o hango ašundilo, o Jesus sas korkořo. Le vortača ašile muto, ai či phende khanikaske, ande kudia vramia, khanči so von dikhle.

₃₇Teharin, kana von vuliste pa o plai, jekh baro narodo avilo angla o Jesus. ₃₈Ai eta, maškar o narodo jekh manuš tsipil:

Birevo, me mangav tu, šiude tjiro dikhimos pe muřo šiav, ke si ma ferdi jekh šiav. ₃₉Jekh duxo lel les, ai strazo tsipil; ai o duxo miškil les zurales, kerel t'avel les spuma, ai trudno leske t'anklel avri anda leste, pala ke phagel les. ₄₀Me řudjisardem tjire vortakon te gonil les, ai von naštisarde.

₄₁Vitsa nasul kai či patian, del palpale o Jesus, ži kana avava me tumensa ai ninkerava me tumen? An kathe tjire šiaves.

₄₂Sar vo pašiolas, o duxo šiudel les tele, ai miškil les zurales. Numa o Jesus daravel le duxo bi-vuže, sastiardias la glata, ai dias les ka lesko dad. ₄₃Ai sa maladias le e čudenia katar o barimos le Devlesko.

Žikin sako sas ande e dragostia de so kerelas o Jesus, vo phenel peske vortakonge:

₄₄Tumenge, ašunen mišto kadia: O Šiav le manušesko trubul t'avel dino ande o vast le manušengo.

₄₅Numa le vortača či hatiarde kudia vorba; sas garadi lenge, eta te na hatiaren; ai von daranas te pušen les pa kudia.

₄₆Eta, jekh gindo avel lenge ka o ilo, te žianen savo anda lende si o mai baro. ₄₇O Jesus, dikhlias lengo gindo ande o ilo, lias jekha tsinořa glata, thodias les paša peste, ₄₈ai phenel lenge:

Varekon kai primil ande muřo anav kadala tsinořa glata primil man; ai kon-godi primil man primil kudales kai tradias man. Ke kudo kai si o mai tsinořo maškar tumende, kudo si o mai baro.

₄₉O Jono lias e vorba, ai phenel:

Birevo, ame dikhliam jekhe manušes kai gonil le demonon ande tjiro anav; ai ame či mukliam les, ke vo či avel amensa.

₅₀Te na keren kadia, phenel leske o Jesus; ke kon nai pe tumende si tumensa.

₅₁Kana e vramia kai trubulas t'avel lino ka o čeri pašiol, o Jesus lias pe te žial ande o Jerusalem. ₅₂Vo tradias angla peste varekas, kai thode-pe pe o drom ai dine andre ande jekh gavořo ande e Samaria, te lašiaren leske kai te bešel. ₅₃Numa či line les, ke vo žialas karing o Jerusalem. ₅₄Le vortača o Jakob ai o Jono, dikhle kudia, phenen:

Baria, kames tu te ame mangas ke e jag te vulel anda o čeri ai te bilaven le?

₅₅O Jesus amboldinisailo karing lende, phenelas:

Tume či žianen če duxo si ande tumende. ₅₆Ke o Šiav le manušesko avilo, na te xasarel le duxuri le manušenge, numa te skipil le.

Ai von gele ande kaver gavořo.

₅₇Žikin von si pe e vurma, jekh manuš phenel leske:

Baria, me žiava tusa kai-godi tu žiasa.

₅₈O Jesus del les palpale:

Le lisitsi si le kai te garadion, ai le čiriklia anda o čeri si le kuiburi; numa o Šiav le manušesko nai les kai te hodinil lesko šero.

₅₉Vo phenel jekh avreske:

Aidi mansa. Ai vo del palpale:

Baria, muk ma angla savořende te žiav te angropov muře dades.

₆₀Numa o Jesus phenel leske:

Muk le mulen t'angropon penge mule; ai tu, žia ta phen e amperetsia le Devleski.

₆₁Jekh kaver phenel:

Me žiava tusa, Baria, numa muk ma angla savořende te žiav te lav mange pozdraimos katar kudala katar muřo kher.

₆₂O Jesus del les palpale:

Kana varekon thol pe te phařavel e phuv ande o kimpo ai porme dikhel palpale, nai vužio ande e amperetsia le Devleski.