Lukas 7

₁Pala ke getosardias sa kudala divanuri angla o narodo kai ašunelas leste, o Jesus dias andre ande o Kapernaum. ₂Jekh fitsiri kai si baro pe jekh šel ketani sas pria astardo ka peski sluga kai sas nasvalo, areselas te merel. ₃Ašundias ke den duma pa o Jesus, vo tradias leste uni purane anda le Židovuri, te mangen les t'avel te sastiarel leska sluga. ₄Von aresle paša o Jesus, ai von but řudjin pe leste, phenenas:

Les šai trubul te des les kudia! ₅Ke leske drago amaro them, ai vo si kai vazdias amari khangeri židovitsko.

₆O Jesus, gelo lensa, nas vo dur katar o kher, kana o fitsiri pe jekh šel tradias vortakon te phenen leske:

Baria, na de tu khanči kjinuimos; ke me či sim harniko t'aves tela muřo čardako. ₇Sa anda kudia me či gindisailem ke sim dosta harniko t'avav karing tute. Numa phen jekh vorba, ai muři sluga avela sasti. ₈Ke, me kai sim tela o vast le barengo, si ma ketani tela muře ordini; ai me phenav jekheske: Žia! ai vo žial; le kavreske: Aidi, ai vo avel; ai muřa slugake: Ker kadia! ai vo kerel.

₉Kana o Jesus ašundias kudala vorbi, leske sas drago o fitsiri ai amboldias pe karing o narodo kai žialas pala leste, vo phenel:

Me phenav tumenge, inke ande o Israel me či arakhlem jekh kasavo patiamos.

₁₀Palpale ka o kher, le žene tradine katar o fitsiri arakhle sasto la sluga kai sas nasvalo.

₁₁O dies pala kudia, o Jesus gelo ande jekh foro akharen les Nain; leske vortača ai jekh baro narodo žianas pe o drom lesa. ₁₂Kana vo areslo paša o vudar le forosko, eta, ningerenas ande le mormuntsi jekhe mules, sas ferdi o jekh šiav peska dako, kai sas phivli; ai sas lasa but žene anda o foro. ₁₃O Baro, dikhlias la, lias les mila latar, ai phenel lake:

Na rov!

₁₄Vo pašilo, ai asbadias o pato. Kudala kai ningerenas les terdile. Vo phenel:

Terno murš, me phenav tuke, ušti!

₁₅Ai o mulo uštilo, ai thodias pe te del duma. O Jesus dias les ka leski dei. ₁₆Sa lias le e dar, ai von luvudisarde le Devles, phenenas:

Jekh baro profeto sikadilo maškar amende,

ai o Del phirel maškar pesko narodo.

₁₇Kudia vorba pe o Jesus geli ande sa e Judea ai ande sa o them krugom.

₁₈O Jono phende leske sa kudala dieli leske vortača. ₁₉Vo akhardias don, ai tradias len karing o Jesus, te phenen leske: San tu kudo kai trubul t'avel, vai trubusaras ame t'ažiukeras jekh aver? ₂₀Aresle paša o Jesus, von phenen: O Jono kai bolel tradias ame karing tute, te phenas tuke:

San tu kudo kai trubul t'avel, vai trubul ame t'ažiukeras aver?

₂₁Ka kudo časo, o Jesus sastiardias bute ženen anda le nasvalimata, le bangimata, ai duxuri xitri, ai kerdias te dikhen but koře. ₂₂Ai vo phenel lenge:

Žian te phenen ka o Jono so tume dikhlian ai ašundian: Le kašuke ašunen, le mule živindin, e laši viasta si phendi ka le čoře. ₂₃Raduime te avel kodo kai či perel ande e bezex mandar.

₂₄Kana le tradine katar o Jono geletar, o Jesus thodias pe te phenel le narodoske, pa o Jono:

So gelian tume te dikhen ande e pusta? Jekh trestia kai miškil la e balval? ₂₅Numa, so gelian tume te dikhen? Jekh manuš uriado ande le tsalia kovle? Eta, kudala kai si pe lende tsalia šukar, ai kai train ande o guglimos, si ande le khera le amperatonge. ₂₆So gelian tume te dikhen? Jekh profeto? Ei, me phenav tumenge, ai mai but sar jekh profeto. ₂₇Si kudo kai si pa leste ramome:

Eta, me tradav muřa sluga kai phenel mai angle angla tjiri fatsa,

Te lašiarel tjiri vurma angla tute.

₂₈Me phenav tumenge, maškar kudala kai arakhadile katar žiuvli, nai mai baro sar o Jono. Numa, o mai tsinořo ande e amperetsia le Devleski si mai baro lestar.

₂₉Ai sa o narodo kai ašunde ai inke kudala kai kjiden e taksa hatiarde e kris le Devleski ai bolde pe ande o bolimos le Jonosko. ₃₀Numa le Farizianuri ai le zakonaria, kai či bolde pe lestar, kerde khanči so kamelas o Del karing lende.

₃₁Sar sikavava me kadia vitsa, ai pe kaste miazol voi? ₃₂Voi miazol sar le šiavoře kai bešen pe o than narodosko. Phenen: Ame gjilabadiam ande e tuturiaza, ai tume či kheldian; ame gjilabadiam gjilia milosi, ai tume či vatisailian. ₃₃Ke o Jono avilo, či xalas ai či pelas, ai phenen: Vo si jekh bengailo. ₃₄O Šiav le manušesko avilo, xalas ai pelas, ai phenen: Si xamatori ai jekh kai pel, jekh vortako kudalenge kai kjiden e taksa ai le narodosko kai si nasul. ₃₅Numa o godiaverimos sas sikado pala so kerdias.

₃₆Jekh Fariziano řudjisardias le Jesus te xal lesa. O Jesus dias andre ande o kher le Farizianosko, ai thodias pe pala e skafidi. ₃₇Ai eta, jekh žiuvli bezexali kai sas ande o foro, ašundias ke vo si pala e skafidi ande o kher ka o Fariziano, andias jekh khoro alabastrosko pherdo duxi, ₃₈ai voi bešli palal, ka le punře le Jesusoske. Voi rovel; ai sigo voi kjingiarel le peske asvensa, porme khoslias le peske balensa, čimidias le, ai makhlias le le duxiansa. ₃₉O Fariziano kai akhardias les gosto, dikhlias kudia, phenel ande peste: Kado manuš te si profeto, vo žianelas kon si ai sar si kadia žiuvli kai asbal les, vo žianelas ke voi si jekh bezexali. ₄₀O Jesus lias e vorba, ai phenel leske:

Simon; si ma vareso te phenav tuke.

Birevo, de duma, del vo palpale.

₄₁Jekh kai del užile sas les dui kai kamenas leske: O jekh kamelas panž šela dinari, ai o kaver panž-var-deš. ₄₂Sar nas len sar te pokjinen, vo muklias vi le donge lengo užilimos. Savo kamelas les mai but? ₄₃O Simon del palpale:

Kudo, gindiv ma, kaske mai but dias palpale.

O Jesus phenel leske:

Mišto kerdian kris.

₄₄Porme, amboldias pe karing e žiuvli ai phenel ka o Simon:

Dikhes kadia žiuvlia? Me dem andre ande tjiro kher, ai tu či dian ma pai te xalavav muře punře; numa voi, kjingiardias le peske asvensa; ai khoslias le peske balensa. ₄₅Tu či čimidian man; numa voi, dekin dem andre, či ašili te čimidel muře punře. ₄₆Tu či dian muial vuloi pe muřo šero; numa voi, voi dias muial duxo pe muře punře. ₄₇Sa anda kudia, me phenav tuke, lake but bezexa si jertime; ke voi but kamlias. Numa kudo kaske jertisaras tsiřa kamel tsiřa.

₄₈Ai vo phenel la žiuvliake:

Tjire bezexa si jertime.

₄₉Kudala kai sas pala e skafidi lesa thode pe te den pe duma ande pende: Kon si kado, kai jertil inke le bezexa? ₅₀Numa o Jesus phenel la žiuvliake:

Tjiro patiamos skipisardias tu, žia ande e patia.