Lukas 18

₁O Jesus mothol lenge jekh paramiči, te sikavel lenge ke trubul sakda te řudjin, ai te na muken pen. ₂Vo phenel:

Sas ande jekh foro jekh krisinitori kai nas leske dar katar o Del ai kai či lelas sama khanikastar. ₃Mai sas ande kudo foro jekh phivli kai avelas te phenel leske: Ker mange kris pe kudo kai si muřo dušmano. ₄But vramia či kamlias. Numa atunči vo phenel ande peste: Makar ke či darav katar o Del; ai ke či lav sama khanikastar, ₅numa, ke sar kudi žiuvli diliarel ma, me dava la kris, eta te na avel butivar te diliarel muřo šero.

₆O Baro mai mothol:

Ašunen so phenel o krisinitori nasul. ₇Ai o Del či kerela vo kris kas vo alosardias kai mangenas lestar ko riat ai ko dies, ai či kerela vo pe lenge? ₈Me phenav tumenge, vo dela len sigo kris. Numa, kana o Šiav le manušesko avela, arakhela vo patiamos pe e phuv?

₉Mai phenel kadia paramiči, kai dikhel uni ženen kai gindin pe ke von si vorta, ai kai či len sama katar le kaver:

₁₀Dui manuš ankliste te žian ka o templo te řudjin; jekh sas Fariziano, ai o kaver jekh kai kjidel e taksa. ₁₁O Fariziano, pe punřende, řudjilas kadia ande peste: O Del, me naisiv tuke ke me či sim sar le kaver manuš, kai čoren, si nasul, ai keren kurvetsia, vai sar kako kai kjidel e taksa. ₁₂Me postiv du-var o kurko, me dav deš anda jekh šel anda sogodi niriv. ₁₃O manuš kai kjidel e taksa ninkerel pe dur, či tromal vadžai te vazdel le jakha pe o čeri; numa malavel pesko kolin, phenel; O Del, na av xoliariko pe mande, kai sim bezexalo. ₁₄Me phenav tumenge, kudo vulisto ande pesko kher vorta, mai mišto sar o kaver. Ke kon-godi vazdiol avela teliardo, ai kudo kai teliol avela vazdino.

₁₅Vi mai anen leske tsinoře glaten, eta t'asbal le. Numa la vortača, dikhle kudia, xoliaile pe kudala kai anen le. ₁₆Ai o Jesus akharel le, ai phenel:

Muken t'aven mande le tsinoře glati, ai na spiden le; ke e amperetsia le Devleski si kudalenge kai miazon sar lende. ₁₇Me phenav tumenge čačimasa, kon-godi či primila e amperetsia le Devleski sar jekh tsinoři glata či dela andre.

₁₈Jekh birevo pušel katar o Jesus, ai phenel:

Lašio rabi, so trubul me te kerav t'avel ma o traio pe sakda?

₁₉O Jesus del les palpale:

Sostar akhares ma tu lašio? Si lašio o Del ferdi. ₂₀Tu žianes le poronki: Tu či keresa kurvetsia; tu či mudaresa; tu či čoresa; tu či phenesa khanči falšo; de pativ tjire dades ai tjira da.

₂₁Lem sa kudala dieli opre de terniara, phenel o birevo.

₂₂O Jesus, ašundias kudia, vo phenel leske:

Mai trubul tu jekh diela: bikjin sa so si tu, de love ka le čoře, ai avela tut jekh mandjin ande o čeri. Porme aidi, ai av mansa.

₂₃Kana vo ašundias kudala vorbi, areslo but nekežime; ke vo sas but barvalo. ₂₄O Jesus, dikhlias ke areslo pria nekežime, phenel:

Če trudno kudalenge kai si len barvalimata te den andre ande e amperetsia le Devleski! ₂₅Ke mai sigo šai jekh gumula te nakhel pa e groapa jekha suviaki sar ke jekh barvalo te del andre ande e amperetsia le Devleski.

₂₆Kudala kai ašunen leste phenen:

Ai kon šai avel skipime?

₂₇O Jesus del palpale:

So naštil te kerel o manuš šai kerel o Del.

₂₈O Petri phenel atunči:

Eta, ame sa mukliam, ai ame aviliam pala tute. ₂₉Ai o Jesus phenel lenge:

Me phenav tumenge čačimasa, nai khonik kai muklias, pala e amperetsia le Devleski, pesko kher, vai peska řomnia, vai peske phralen, vai peske niamon, vai peske glaten, ₃₀kai či lela mai but ande kadala berš, ai, ande le berš kai avena, o traio pe sakda.

₃₁O Jesus lias le deš-u-don paša peste, ai phenel lenge:

Eta, ame anklias ande o Jerusalem, ai sogodi sas ramome katar le profeturi pala o Šiav le manušesko aresela. ₃₂Ke vo avela dino ande o vast kudalenge kai či patian; marena mui lestar, dena les pe o lažiav, čungardena pe leste. ₃₃Ai, pala ke marena les la rovliasa, mudarena les, ai o trito dies vo živindila.

₃₄Numa von či hatiarde khanči anda kudia; sas lenge jekh šib garadi, vorbi kai či hatiarenas so si.

₃₅Sar o Jesus pašilas ande o Jeriko, jekh kořo bešelas tele paša e vurma, ai mangelas. ₃₆Ašunelas ke o narodo nakhel, pušelas so si. ₃₇Phenen leske: Si o Jesus anda o Nazaret kai nakhel. ₃₈Ai vo tsipil:

Jesus, Šiav katar o David, t'avel tuke mila mandar!

₃₉Kudala kai phirenas anglal ašiaven les, te na del duma; numa vo tsipilas mai zurales:

Šiav katar o David, t'avel tuke mila mandar!

₄₀O Jesus, terdilo, dias ordina t'anen les leske; ai, kana pašilo, vo pušel lestar:

₄₁So manges tu te kerav tuke?

Vo del palpale:

Baria, t'aresav te dikhav.

₄₂Ai o Jesus phenel leske:

Puter tjire jakha, tjiro patiamos skipisardias tu.

₄₃Strazo vo dikhlias pale, ai gelo pala o Jesus, vestilas le Devles. Sa o narodo, dikhlias kudia, luvudil le Devles.