Lukas 15

₁Sa kai kjiden e taksa ai le žene kai nai lengo traio lašio pašion paša o Jesus t'ašunen leste. ₂Ai le Farizianuri ai le zakonaria bulguin, phenenas:

Kado manuš primil le ženen kai si le nasul traio, ai xal lensa.

₃Numa vo phenel lenge kadia paramiči:

₄Savo manuš maškar tumende, t'avela les jekh šel bakroře, ai te xasarela jekhes, či mukela le inia-var-deš ai inia kavren ande o pusto te žial pala kudo kai si xasardo, ži kai či arakhel les? ₅Kana vo arakhel les, vo thol les veselimasa pe le zeia, ₆ai, palpale ka o kher, vo akharel peske vortakon ai kon si paša leste, ai phenel lenge: Veselin tume mansa, ke me arakhlem muře bakrořes kai sas xasardo. ₇Sa jekh fialo, me phenav tumenge, avela mai but veselia ande o čeri pala jekh bezexalo kai keil pe, ke pala inia-var-deš ai inia kai či trubul te kein pe.

₈Vai savi žiuvli, t'avela la deš palianki, ai te xasarela jekh, či del jag jekh lampa, ai rodel la mišto, ži kai či arakhel la? ₉Kana voi arakhel la, voi akharel peske vortakon ai kon si paša late, ai phenel: Veselin tume mansa, ke me arakhlem e palianka kai me xasardemas. ₁₀Sa jekh fialo, me phenav tumenge, si veselia angla le andželi le Devleske pala jekh bezexalo kai keil pe.

₁₁Vo mai phenel:

Jekh manuš sas les dui šiave. ₁₂O mai terno phenel peske dadeske: Muřo dad, de ma e partia kai trubul t'avel muři. Ai o dad huladias so si lesko. ₁₃Uni dies pala kudia, o mai terno šiav, kjidias sa, gelotar pe jekh them dur, kai biladias pesko mištimos, trailas ande e kurvetsia. ₁₄Kana sa xalias, jekh bari bokh aresli ande o them, ai vo areslo ke trubul les sa. ₁₅Vo gelo te thol pe te kerel butji kai jekh kai bešel ande o them, kai tradias les ande peske kimpuri t'arakhel le balen. ₁₆Vo kamelas te pravarel pe anda so xanas le bale, numa khonik či delas les. ₁₇Gindisailo ande peste, vo phenel peske: Sode butiaria ka muřo dad si len but manřo, ai me, kathe, merav bokhatar! ₁₈Me uštiava, me žiava karing muřo dad, ai me phenava leske: Muřo dad, me kerdem bezex karing o čeri ai karing tute, ₁₉me či mai sim harniko t'akharen ma tjiro šiav; ker anda mande sar jekh anda tjire butiaria. ₂₀Ai vo uštilo, ai gelo karing pesko dad.

Sar vo sas dur, lesko dad dikhlias les ai lias les e mila, vo našlo te šiudel pe ka leski koř ai čimidias les. ₂₁O šiav phenel leske: Muřo dad, me kerdem bezex pe o čeri ai pe tute, me či mai sim harniko t'akharen ma tjiro šiav. ₂₂Numa o dad phenel ka peske služi: Anen sigo e mai laši bunda, ai thon la pe leste; anen leske jekh angrusti pe o nai, ai papuča pe le punře. ₂₃Anen le vitselos kai ame thuliardiam ai mudaren les. Xas ai veselisavas; ₂₄ke muřo šiav kai eta lo sas mulo, ai vo avilo ka o traio; vo sas xasardo, ai les arakhliam les. Ai von line pe te veselin pe.

₂₅Eta, o šiav o mai baro sas ande le kimpuri. Kana vo avilo ai pašiol paša o kher, vo ašundias e musika ai le khelimata. ₂₆Vo akharel jekhes anda le služi, ai pušel lestar so si. ₂₇Kudo sluga phenel leske: Tjiro phral avilo palpale, ai, ke vo si sasto vesto, tjiro dad mudardias le vitselos thuliarde. ₂₈Les lias les e xoli, ai či kamelas te del andre. Lesko dad anklisto avri, ai mangel les te del andre. ₂₉Numa vo del palpale ka pesko dad: Eta, de kaiti but berš kai me služiv tu, bi šoha te šinav tjire ordini, ai šoha tu či dian ma jekh bakrořes te veseli ma muře vortakonsa. ₃₀Ai kana tjiro šiav areslo, kudo kai xalias tjiro mištimos le kurvensa, leske tu mudardian le vitselos thuliarde! ₃₁Muři glata, phenel leske o dad, tu san sakda mansa, ai sogodi si ma si tjiro; ₃₂numa trubul t'avas veseli ai te veselisavas, ke tjiro phral eta lo sas mulo ai vo avilo ka o traio, vo sas xasardo ai arakhliam les.