Lukas 11

₁O Jesus řudjilas jekh dies ande jekh than alome. Kana getosardias, jekh anda leske vortača phenel leske:

Baria, sikiar ame te řudjisaras, sar o Jono sikiardias ka peske vortača.

₂Vo phenel leske:

Kana tume řudjina, phenen:

Tate!

Ke tjiro anav t'avel svintsime,

ke tjiri amperetsia t'avel. ₃De ame sako dies amaro manřo diesesko.

₄Jertisar amenge amare bezexa, ke vi ame jertisaras kudalenge kai den ame pe o lažiav;

ai na zumav ame.

₅Vo mai phenel lenge:

Te si jekh anda tumende ke si les jekh vortako, ai ke žial maškar e riat t'arakhel les te phenel leske: Vortako, de ma užile trin manře, ₆ke jekh anda muře vortača avilo dural mande, ai nai ma khanči te dav les, ₇ai t'avela, andral anda o kher, ke kudo vortako del les palpale: Na diliar ma, o vudar si vuže phandado, muře glati ai me sam ande o than, me naštiv t'uštiav te dav tu manře. ₈Me phenav tumenge, makar ke či uštela te del tut ke sas lesko vortako, vo uštela ke diliares les ai dela tu sogodi trubul tu. ₉Ai me, phenav tumenge: Mangen, ai dena tumen: Roden, ai tume arakhena: Malaven, ai putrena tumenge. ₁₀Ke kon-godi mangel lel, kudo kai rodel arakhel, ai putren kudaleske kai malavel. ₁₁Savo si maškar tumenge o dad kai dela jekh bař peske šiaves, te mangela lestar manřo? Vai, te mangela jekh mašio, dela les vo jekh sap ande o than le mašesko? ₁₂Vai, te mangela vo jekh anřo, dela les vo jekh skorpionka? ₁₃T'avela kadia, ke tume kai san nasul žianen te den laše dieli ka tumare glati, sar mai but o Dad anda o čeri dela vo o Svinto Duxo kudalenge kai mangen lestar.

₁₄O Jesus gonil jekh duxo nasul kai sas muto. Kana o duxo anklisto avri, o muto del duma, ai o narodo čudisailo. ₁₅Numa uni phenen:

Si katar o Beelzebul, o prinso le demonongo, ke vo gonil le demonon.

₁₆Ai le kaver, te zumaven les, mangle lestar jekh semno kai avel anda o čeri. ₁₇Sar o Jesus žianelas lenge ginduri, vo phenel lenge:

Sako amperetsia huladi pe peste si phařadi, ai jekh kher perel pe jekh avreste. ₁₈T'avela ke o Satan si hulado pe peste, sar leski amperetsia bešela voi? Ke tume phenen ke me goniv le demonon katar o Beelzebul. ₁₉Ai t'avela me, me te goniva le demonon katar o Beelzebul, tumare šiave, kastar gonina le von? Sa anda kudia von avena tumare krisinitoria. ₂₀Numa, t'avela ke si katar o nai le Devlesko ke me goniv le demonon, e amperetsia le Devleski avili voi karing tumende. ₂₁Kana jekh manuš zuralo ai mišto armime arakhel pesko kher, so si lesko si garado. ₂₂Numa, te jekh mai zuralo avel ai ninkerel les, vo lel lestar sa le armi ande kaste vo gjinelas pe, ai hulavel so si les. ₂₃Kudo kai nai mansa si pe mande, ai kudo kai či kjidel mansa šiudel.

₂₄Kana o duxo nasul anklel avri anda jekh manuš, vo žial ande le thana pusti, te rodel te hodinil. Či arakhel, vo phenel: Me žiava palpale ande muřo kher anda savo me anklistem avri; ₂₅ai, kana arakhel, vo arakhel les šulado ai lašiardo. ₂₆Atunči vo žialtar, ai vo lel efta aver duxuri mai nasul lestar; von den andre ande o kher, kothe bešen, ai kudale manušeske si mai nasul sar mai anglal.

₂₇Žikin o Jesus del duma kadia, jekh žiuvli, vazdias o hango maškar o narodo, phenel leske:

Veselo o peř kai ninkerdias tu! Veseli le čuča kai pravarde tu!

₂₈Ai vo del palpale:

Veseli mai sigo kudala kai ašunen e vorba le Devleski, ai kai arakhen la!

₂₉Sar o narodo kjiden pe but, vo lias pe te phenel:

Kadia vitsa si jekh vitsa nasul; voi mangel jekh čudenia; či avela lenge dini numa e čudenia kuda katar o Jonas. ₃₀Ke, sar o Jonas sas jekh semno kudalenge anda o Ninive, sa kadia o Šiav le manušesko avela jekh pe kadia vitsa. ₃₁E amperatsiasa katar e rig tele uštela, o dies kai avela e kris, le manušenge kudala vitsatar ai dela len strafo, ke voi avel anda o gor la phuviako t'ašunel o godiaverimos katar o Salomon; ai eta, si kathe vareso mai but sar o Salomon. ₃₂Le manuš anda o Ninive uštena, o dies kai avela e kris, kudala vitsasa ai dena la strafo, ke či keisaile kana dias duma o Jonas! ai eta, si kathe vareso mai but sar o Jonas.

₃₃Khonik či del jag jekh lampa te thol les ande jekh than garado tela e vadra, numa thon les pe e vadra, eta ke kudala kai den andre te dikhen e vedaria. ₃₄Tjiri jakh si o lampa tjire statosko. Kana tjiri jakh si laši, sa tjiro stato si te strefial; numa kana tjiri jakh nai laši, tjiro stato si ande o tuniariko. ₃₅Le sama ke e vedaria kai si ande tute te na avel tuniariko. ₃₆T'avela ke tjiro stato strefial, ai či jekh partia nai ande o tuniariko, vo avela sa te strefial, sar ke jekh lampa kerel te strefial.

₃₇Žikin o Jesus del duma, jekh Fariziano řudjil les t'avel te xal leste. Vo del andre, ai thodias pe pala e skafidi. ₃₈O Fariziano dikhlias čudimasa ke či xaladias peske vast mai angla o xamos. ₃₉Numa o Baro phenel leske:

Tume le Farizianuri, tume khosen avrial o taxtai ai o tiari, ai ande tumen andre si o čorimos ai o nasulimos. ₄₀Dile! Kudo kai kerel so si avrial či kerdias vo vi so si andral? ₄₁Den mai sigo so si andral le čořenge, ai eta, sako diela avela vuži tumenge. ₄₂Numa nasul t'avel tumenge, Farizianuri! Ke tume pokjinen jekh pe deš pa e menta, pa e ruta, ai pa sa le čara, numa tume muken rigate e kris ai o kamimos le Devlesko; kudala trubulas tume te keren bi te bustren le kaver dieli.

₄₃Nasul t'avel tumenge, Farizianuri! Ke si tumenge drago le mai angluni skamina ande le khangeria židovitsko, ai te den tume pozdraimos pe le platsuri narodoske. ₄₄Nasul t'avel tumenge! Ke tume si sar le groapoševuri kai či dikhion, ai pe save le manuš phiren bi te žianen. ₄₅Jekh zakonari lias e vorba, ai phenel leske:

Birevo, sar tu des duma, vi kadia amen des pe o lažiav.

₄₆Ai o Jesus del palpale:

Nasul t'avel vi tumenge, zakonaria! Ke tume phariaren le manušen pharimos trudno te ningeren ai ke tume či asban o pharimos jekhe tumare naiesa te ažutin len. ₄₇Nasul t'avel tumenge! Ke tume vazden le groapoševuri le profetonge kai tumare dada mudarde. ₄₈Tume san kadia martururi anda so kerde tumare dada, ai tume žian pala lende; ke von, von mudarde le profeton, ai tume, tume vazden lenge groapoševuri. ₄₉Sa anda kudia o Del ande pesko godiaverimos phendias: Me tradava lenge profeton ai apostolon; von mudarena le unen ai marena le kavren. ₅₀Eta t'avel manglo katar kadia vitsa o rat katar sa le profeturi kai sas dino muial dekin kerdilias e lumia, ₅₁de katar o rat katar o Abel ži ka o rat katar o Zakaria, mudardo maškar o altari ai o templo; ei, me phenav tumenge, avela manglo katar kadia vitsa.

₅₂Nasul t'avel tumenge, zakonaria! Ke tume lian e kjeia te putren le vudara le žianimaske, tume či dian andre, ai tume či muklian te den andre kudalen kai kamenas te den andre. ₅₃Kana anklisto avri kothar, le zakonaria ai le Farizianuri line pe te kjiden les zurales, ai keren te del duma pe but dieli; ₅₄zumaven les, te len sama uni vorbi kai anklen anda lesko mui.