Jono 16

₁Me phendem tumenge kadala dieli, eta te na muken tumaro patiamos. ₂Von dena tumen avri anda le khangeria židovitsko; ai inke o časo avel kana kodo kai mudarela tumen gindila ke vo kerel mištimos le Devleske. ₃Ai von kerena kadia, ke von či prinžiaren či le Dades či man. ₄Me phenav tumenge kadala dieli, eta ke, kana o časo avela, tume dena tume godji ke me phendem le tumenge.

Me či phendem le tumenge d'anda o gor, ke me simas tumensa. ₅Akana me žiavtar karing kudo kai tradias man, ai khonik anda tumende či pušel ma: Kai žias tu? ₆Numa, sar ke me phendem tumenge kadala dieli, o nekazo dias ande tumaro ilo. ₇Numa me phenav tumenge o čačimos: mai mišto avelas tumenge ke me žiavtar, ke te či žiavatar, kudo kai lel sama tumendar či avela karing tumende; numa, te žiavatar, me tradava les tumenge. ₈Ai kana vo avela, vo sikavela la lumiake so si e bezex, e kris, ai o strafo ai sar le žene šibin pe. ₉So si e bezex, ke von či patiana ande mande; ₁₀so si e kris, ke me žiav ka o Dad, ai ke tume či mai dikhena ma; ₁₁so si o strafo, ke o prinso kadala lumiako si dino pe kris.

₁₂Mai si ma but dieli te phenav tumenge, numa tume naštin te řibdin le akana. ₁₃Kana o Duxo le čačimasko avela, vo ningerela tumen ande sa o čačimos; ke vo či dela duma anda peste, numa vo phenela sa so vo ašundias, ai vo phenela tumenge le dieli kai avena. ₁₄Vo luvudila man, ke vo lela so si muřo, ai phenela tumenge. ₁₅Sogodi o Dad si les si muřo; sa anda kudia me phendem ke vo lela so si muřo, ai ke o Duxo phenela les tumenge.

₁₆Mai tsiřa vramia, ai tume či mai dikhena ma; ai porme mai tsiřa vramia, ai tume dikhena ma.

₁₇Pe kudia, uni anda leske vortača phenen maškar pende: So si kudia kai vo phenel: Mai tsiřa vramia, ai tume či mai dikhena ma; ai porme mai tsiřa vramia, ai tume dikhena ma? ai: Ke me žiav ka o Dad? ₁₈Von mai phenen: So si kudo kai phenel: Mai tsiřa vramia? Ame či žianas pa soste del duma.

₁₉O Jesus hatiardias ke von kamenas te pušen les, ai vo phenel lenge: Tume pušen jekh avrestar pa soste me phendem: Mai tsiřa vramia, ai tume či mai dikhena ma, porme mai tsiřa vramia, ai tume dikhena ma. ₂₀Čačimasa, čačimasa, me phenav tumenge, tume rovena ai tume vatina tume, ai e lumia veselila pe. Tume avena ande o nekazo, numa tumaro nekazo pařudiola ande veselia. ₂₁E žiuvli, kana avela jekh glata, si la nekazo, ke lako časo avilo; numa, kana e glata arakhadili, voi či mai del pe godji ka pesko kjinuimos, pala e veselia kai si la ke jekh manuš arakhadilo ande e lumia. ₂₂Vi tume kadia, tume san akana ande o nekazo; numa dikhava tumen, ai tumaro ilo veselila pe, ai khonik či lela tumen anda tumari veselia.

₂₃Ande kudo dies, tume či mai pušena ma pa khanči. Čačimasa, čačimasa, me phenav tumenge, so tume mangena katar o Dad, vo dela les tumenge ande muřo anav. ₂₄Ži akana tume či manglian khanči ande muřo anav. Mangen, ai tume lena, eta ke te tumari veselia t'avel vorta.

₂₅Me phenav tumenge kadala dieli sar paramiča. O časo avel kai me dava duma tumensa bi paramičengo, numa kai me dava duma tumensa puterdes pa o Dad. ₂₆Ande kudo dies, tume mangena ande muřo anav, ai me či phenava tumenge ke me řudjiva le Dades tumenge. ₂₇Ke o Dad inke vo kamel tumen, ke tume kamlian man, ai ke tume patian ke me anklistem avri anda o Del. ₂₈Me anklistem anda o Dad, ai me avilem ande e lumia; akana me mukav e lumia, ai me žiav ka o Dad.

₂₉Leske vortača phenen leske: Eta, akana tu des duma puterdes, ai tu či phenes či jekh paramiči. ₃₀Akana ame žianas ke tu žianes sa le dieli, ai ke tut či trubul tu khonik te pušel tu; sa anda kudia ame patias ke tu anklistian anda o Del.

₃₁O Jesus del len palpale: Tume patian akana. ₃₂Eta, o časo avel, ai inke avilo, kai tume avena puřitsime sako pe peski rig, ai kai tume mukena ma korkořo; numa me či sim korkořo, ke o Dad si mansa. ₃₃Me phenav tumenge kadala dieli, eta t'avel tumen e patia ande tumende. Avena tumen bunto ande e lumia; numa len zor, me nirisardem la lumia.