Jono 1

₁Anda gor sas e Vorba, ai e Vorba sas le Devlesa, ai e Vorba sas o Del. ₂Vo sas de anda o gor le Devlesa. ₃Sa le dieli sas kerde lestar, ai khanči anda so si kerdo nas kerdo bi leste. ₄Ande leste sas o traio, ai o traio sas e vedaria le manušengi. ₅E vedaria strefial ande o tuniariko, ai o tuniariko či lias la.

₆Sas jekh manuš tradino katar o Del: lesko anav sas Jono. ₇Vo avilo sar marturo, te del marturia la vedariake, eta ke te sa patian ande late. ₈Vo nas e vedaria, numa vo sikadilo t'avel marturo ka e vedaria. ₉Kadia vedaria sas e čači vedaria, kai avili ande e lumia ai strefial sako manušes.

₁₀Vo sas ande e lumia, ai e lumia sas kerdi lestar, ai e lumia či prinžiardias les. ₁₁Vo avilo ando pesko them, ai leske či line les. ₁₂Numa ka sa kadala kai line les, ka kudala kai patian ande lesko anav, vo dias len e putiaria t'aresen glati le Devleske, ₁₃save arakhadile, či anda o rat, či anda so kamelas o mas, či anda so kamlias o manuš, numa anda o Del.

₁₄Ai e Vorba areslo mas, ai vo bešlo maškar amende, pherdo mištimos ai čačimos; ai ame dikhliam lesko vestimos, jekh vestimos sar o vestimos le jekhe Šiavesko kai avel katar o Del.

₁₅O Jono sas lesko marturo, ai vo tsipil: Si kudo kai me phendem. Kudo kai avel pala mande sas mai opral mandar, ke vo sas angla savořende mandar.

₁₆Ai ame sa liam leski dragostia ai mištimos pe šukarimos; ₁₇ke o zakono sas thodino katar o Moše, o mištimos ai o čačimos avile katar o Jesus Kristo. ₁₈Khonik šoha či dikhlias le Devles; lesko ferdi jekh Šiav, kai si ande e angali le Dadeski, si kudo kai kerdias te žianas les.

₁₉Eta so phenel o Jono, kana le Židovuri tradine anda o Jerusalem le rašan ai le Leviton, te pušen les: Tu, kon tu san?

₂₀Vo del palpale, ai či xoxavel, vo phenel ke nai vo o Kristo.

₂₁Ai von pušen les: So si? san tu o Elia? Ai vo phenel: Me či sim. San tu o profeto? Ai vo del palpale: Niči.

₂₂Von phenen leske atunči: Kon tu san? eta te das ame palpale kudalenge kai tradine amen. So phenes tu pa tute?

₂₃Me, phenel vo, me sim o hango kudalesko kai tsipil ande e pusta:

Lašiaren e vurma le Bareski, sar phendias o Esai, o profeto.

₂₄Kudala sas tradine katar le Farizianuri. ₂₅Von mai pušen les kadia: Sostar tu boles, te na san tu o Kristo, ai či o Elia, ai či o profeto?

₂₆O Jono del len palpale: Me, bolav ande o pai, numa maškar tumende si varekon kai tume či žianen, kai avel pala mande. ₂₇Me či sim harniko te putrav e dori pa leske papuča.

₂₈Kudala dieli nakhle ande e Betania, inčial o Jordan, kai o Jono bolelas.

₂₉Teharin, vo dikhlias le Jesus ke avel leste, ai vo phenel: Eta o bakrořo le Devlesko, kai lel e bezex la lumiaki. ₃₀Kado si kai phendem pa leste: Pala mande avel jekh manuš kai sas mai opral mandar, ke sas angla savořende mandar. ₃₁Me či prinžiaravas les, numa si te sikadiol ande o Israel ke me avilem te bolav ande o pai.

₃₂O Jono phendias kadia marturia: Me dikhlem o Duxo ke vulel anda o čeri sar jekh gulumbo ai terdilo pe leste. ₃₃Me či prinžiaravas les, numa kudo kai tradias ma te bolav ande o pai, kudo phendias mange: Kudo pe kaste tu dikhes ke o Duxo vulel ai terdiol, kudo si kai bolel ande o Svinto Duxo. ₃₄Ai me dikhlem, ai me sim marturo ke vo si o Šiav le Devlesko.

₃₅Teharin, o Jono mai sas kothe, dui ande leske vortača lesa; ₃₆ai, dikhlias le Jesus ke nakhel, vo phenel: Eta o bakrořo le Devlesko.

₃₇Le dui vortača ašunen leste ke phendias kudala vorbi, ai von gele pala o Jesus. ₃₈O Jesus amboldinisailo, ai vo dikhlias ke von aven pala leste, vo phenel lenge: So roden tume? Von dine les palpale: Rabi (kudia bušol Birevo), kai bešes tu?

₃₉Aven, phenel lenge vo, ai dikhen. Von gele, ai von dikhle kai vo bešel; ai von bešle paša leste kudo dies. Sas pašte o štarto časo pala mismeri.

₄₀O Andreas, o phral katar o Simon Petri, sas jekh anda le dui kai ašundiasas le vorbi katar o Jono, ai kai gelo pala o Jesus. ₄₁Vo si kai arakhlias o mai angluno peske phrales le Simon, ai vo phenel leske: Ame arakhliam le Mesias (kudia bušol Kristo). ₄₂Ai vo ningerdias les karing o Jesus. O Jesus, dikhlias pe leste, phenel: Tu san o Simon, šiav katar o Jonas; tut akharen tut Sefas (Grekitsko-Petri), kudia bušol «bař».

₄₃Teharin, o Jesus kamelas te žial ande e Galilea, ai vo arakhel le Filipo. Vo phenel leske: Av mansa. ₄₄O Filipo sas anda e Betsaida, anda o foro katar o Andreas ai o Petri. ₄₅O Filipo arakhlias le Natanael, ai phenel leske: Ame arakhliam kudales pa kaste o Moše ramosardias ande o Zakono kai le profeturi dine duma pa leste, o Jesus anda o Nazaret, šiav katar o Josef.

₄₆O Natanael phenel leske: Šai avel anda o Nazaret vareso lašio? O Filipo del les palpale: Aidi ai dikh.

₄₇O Jesus, dikhlias ke avel leste o Natanael, phenel pa leste: Eta čačes jekh Israelito, ande kaste nai xoxaimos.

₄₈Katar žianes ma tu? phenel leske o Natanael. O Jesus del les palpale: Angla savořende ke o Filipo akhardias tu, kana tu sanas tela o kopači le figengo, me dikhlem tu.

₄₉O Natanael mai lias pe ai phenel leske: Rabi, tu san o Šiav le Devlesko, tu san o amperato anda o Israel.

₅₀O Jesus del les palpale: Sar ke me phendem tuke ke dikhlem tu tela o kopači le figengo, tu patias; tu dikhesa but mai bare dieli sar kadala. ₅₁Ai vo phenel leske: Čačimasa, tume dikhena d'akanara o čeri puterdiol ai le andželi le Devleske anklen ai vulen pe o Šiav le manušesko.