Jakob 5

₁Šunen barvale! Roven ai vatin tume, pala le nasulimata kai aven pe tumende. ₂Tumare barvalimata si kjermale, ai tumare tsalia si xale katar le kjermi. ₃Tumaro sunakai ai tumaro rup si řužinime. Ai lengo řužinimos uštel te del marturia pe tumende, ai xala tumaro mas sar jekh jag. Tume kjidian mandjinata pe le posledni dies! ₄Eta, o pokjinimos le butiarengo kai kjidine ande tumare kimpuri, ai kai tume lian lendar, tsipin, ai le tsipimata ka kudala kai kjide aresle ži ka le kan le Bareske le řaioske zurale. ₅Tume traisardian pe e phuv ande o šukarimos ai ande e dragostia, tume pravardian tumare ile ka o dies o phařaimasko. ₆Tume dian strafo, tume mudardian le bi-došales, kai či ninkerdias-pe pe tumende.

₇T'avel tumen te ažiukeren, phralale, žikin či avela o Baro; Eta, kai phařavel e phuv ažiukerel e kuč fruta la phuviaki, lel sama latar, žikin či lel le brišinda katar e primavera ai e tomna ia. ₈Vi tume, te ažiukeren, zuriaren tumare ile, ke e vramia le Bareski pašiol.

₉Na vatin tume jekh avrestar, phralale, eta te na aven tume dine kris: eta, o krisinitori si ka o vudar. ₁₀Len, muře phral, sar modelo ande o kjinuimos ai o ažiukerimos le profeton kai dine duma ande o anav le Baresko. ₁₁Eta, ame phenas veseli kudala kai řebdisard e. Tume ašundian ke dine duma sar řebdisaras o Job, ai tume dikhlian o getomos kai o Baro dias les, ke o Baro si pherdo mila ai lašimos.

₁₂Angla savořende andasa, phralale, na solaxan či pa o čeri, či pa e phuv, či pa jekh kaver solax. Numa ke tumaro «ei» t'avel «ei», ai ke tumaro «na» t'avel «na», eta ke tume te na peren tela e kris. ₁₃Si varekon anda tumende ke si ande e dukh? Ke te řudjil. Varekon si ande e veselia? Ke te gjilabel gjilia. ₁₄Varekon anda tumende si nasvalo? Ke t'akharel le phuren katar e Khangeri, ai ke le phure te řudjin lenge, te thon pe leste vuloi ande o anav le Baresko; ₁₅o řudjimos le patiamasko skipila le nasvales, ai o Baro uštiavela les. Ai te kerdias vo bezexa, avela leske jertime. ₁₆Puřin tumare bezexa jekh avreske, ai řudjin jekh avreske, eta t'aven saste. O řudjimos kudalesko kai si vorta si zuralo. ₁₇O Elia sas jekh manuš sa jekh fialo sar amende: vo řudjisardias zurales te na del brišin, ai či dias brišin pe e phuv trin berš ai šov šion. ₁₈Porme mai řudjisardias, ai o čeri dias brišin, ai e phuv dias fruti.

₁₉Muře phralale, te si jekh maškar tumende ke dias rigate dur katar o čačimos, ai ke jekh kaver anel les palpale, ₂₀ke te žianen ke kudo kai andias jekhe bezexales katar e vurma kai vo xasailo skipila jekh duxo katar e martia ai kerel te aven jertime but bezexa.