Galatian 4

₁Eta, kana kudo kai si te lel o mištimos si glata, me phenav ke vo si inke sar jekh řobo, makar ke avela birevo pe sa; ₂numa vo si tela o vast kudalengo kai len sama lestar ai katar leske mištimata ži ande e vramia kai thodias o dad. ₃Vi ame, sa kadia, kana ame samas glati, ame samas tela o thodimos katar le putari kai si ande kadia lumia; ₄numa, kana e vramia nakhli, o Del tradias peski Šiaves, arakhadilo katar jekh žiuvli, arakhadilo tela o Zakono, ₅eta te kjinel kudalen kai sas tela o Zakono, eta ame te las so avel amenge sar šiave.

₆Ai ke sar ke tume san šiave, o Del tradias ande amare ile o Duxo katar pesko Šiav, savo tsipil: Abba! Tate! ₇Kadia tu či mai san řobo, numa šiav; ai te san tu šiav, tu vi san te les o mištimos katar o Del.

₈Aver data, či žianenas le Devles, tume služinas le devlen kai nai von čače dela; ₉numa akana kai tume žianen le Devles, vai mai mišto kai prinžiarel tumen o Del, sar žiana tume palpale ka kudala kovle ai bi-laše zora so si, kasaven mai kamen tume te služin? ₁₀Numa tume len sama le dies, le šion, le vrami ai le berš! ₁₁Me darav ke intaino kerdem sa e butji tumenge.

₁₂Aven sar mande, ke vi me sim sar tumende. Phralale, řudjiv tume. Tume či kerdian mange či jekh doš. ₁₃Tume žianen ke si pala jekh bangimos ande o mas ke pe e mai angluno data me phendem tumenge e Laši Viasta. ₁₄Ai simas zumado ande muřo mas, tume či sikadian či vuřetsia či griatsia; tume sikadian mange, aver fialo, lian ma sar jekh andželo le Devlesko, sar o Jesus Kristo. ₁₅Kaila akana sa tumari veselia? Ke me phendem tumenge ke, te šai t'avel kudia, tume ankaladianas avri tumare jakha te den le mange. ₁₆Areslem me tumaro dušmano ke phenav tumenge o čačimos?

₁₇O gribimos kai si len tumenge nai vužio, numa von kamen te šinen tume amendar, eta te gribin tume lenge. ₁₈Mišto si t'avel gribimos tumenge pe so si mišto ai ande sa e vramia, ai na ferdi kana sim maškar tumende. ₁₉Muře glati, pala kudalende dukhal ma sar kana arakhadiol jekha žiuvliake jekh šiav, žikin či o Kristo t'avel ande tumende, ₂₀me kamlemas t'avav akana paša tumende, ai te pařuvav e šib, ke me darav anda tumende.

₂₁Phenen mange, tume kai kamen t'aven tela o Zakono, či ašunen tume o Zakono? ₂₂Ke si ramone ke o Abraham sas les dui šiave, jekh katar e řobitsa, ai jekh katar e žiuvli slobodo. ₂₃Numa kudo katar e řobitsa arakhadilo sar si o mas, ai kudo katar e žiuvli slobodo sar sas leske phendo katar o Del. ₂₄Kudala dieli si sar paramiči. Eta kudala dui žiuvlia si dui patii, jekh katar o plai o Sinai, dias glati t'aven služi, si e Hagar, ₂₅ke e Hagar, si sar o plai o Sinai ande e Arabia, ai o Jerusalem themesko, kai si ande o služimos peske glatensa. ₂₆Numa o Jerusalem čeresko si slobodo, vo si amari dei; ₂₇Ke si ramome:

₂₈Tumenge, phralale, sar o Isak, tume san le glati arakhadile sar sas šindo katar o Del; ₂₉ai sa jekh fialo sar atunči kudo kai arakhadilo sar si o mas kjinuil kudales kai arakhadilo sar si o Duxo, kadia si vi akana. ₃₀Numa so phenel o Ramomos? Gonisar le řobitsa ai lake šiaves, ke o šiav katar e řobitsa či lela partia katar muřo mištimos le šiavesa katar e žiuvli slobodo. ₃₁Sa anda kudia, phralale, ame či sam glati katar e řobitsa, numa katar e žiuvli slobodo.