Apostoli 20

₁Kana o buntuimos ašilo, o Paul kjidias le vortakon ai, pala ke zuriardias le, gelotar lendar, ai gelo ande e Makedonia. ₂Vo nakhlo pa kudia rig, phenelas le vortakonge but te zuriarel le. Porme gelo ande e Gretsia, ₃kai bešlo trin šion. Vo kamelas te lel čuno te žial ande e Siria, kana le Židovuri kerde pa leste te na žial. Atunči dias pe godji te lel o drom la Makedoniako. ₄Sas lesa te žian ande e Azia: O Sopator anda o Berea, šiav katar o Pirus, o Aristark ai o Sekond anda e Tesaloniki, o Gaius anda o Derbe, o Timoteo, vi o Tixiko ai o Trofimo anda e Azia. ₅Kudala gele anglal, ažiukerde amen ande o Troas. ₆Amenge, pala le diesa bi-drosdake liam o čuno ande o Filipi, ai, ande panž diesa, ame kjidinisailiam ande o Troas, kai ame nakhliam kothe efta diesa.

₇O mai angluno dies anda o kurko, ame kjidinisailiam te phagas o manřo. O Paul, kai trubulas te žialtar teharin, delas duma le vortakonsa ai gelo lesko divano ži o maškar la ratiako. ₈Sas but lampuri ande e soba opre kai ame samas kjidine. ₉Eta, jekh terno murš akharen les Eutikus, kai bešelas pe e feliastra, suto pria zurales žikin del duma but o Paul, vo pelo pa o trito čardako tele, ai line les mulo. ₁₀Numa o Paul, vulisto, bangilo karing leste ai lias les ande peski angali, phenelas: Na rimon tume, ke lesko duxo si ande leste. ₁₁Atunči vo anklisto opre, phanglias o manřo ai xalias, ai mai dias duma but ži ande o dies. Pala kudia vo anklisto avri. ₁₂O terno murš ningerde les živindo, ai savořenge sas mišto.

₁₃Amenge, ame geliam angla savořende pe o čuno angla o Paul, ai ame geliam pe jekh čuno ande o Asos, kai ame phendiam leske ke lasa les, ke vo manglias te kerel o drom pe punřende. ₁₄Kana vo areslias ame ande o Asos, ame liam les pe o čuno, ai ame geliam ande o Mitileni. ₁₅Kothar, geliam angle pa e maria, ai aresliam teharin angla o Xios. O dies pala kudo, ame aviliam karing o Samos, ai o dies pala kudo ame dikhliam o Mileto. ₁₆O Paul dias pe godji te nakhel angla o Efese bi te terdiol, eta te na xasarel e vramia ande e Azia; ke vo gribilas pe t'arakhadiol pe, si šai daštila, ande o Jerusalem o dies la Řusaliako.

₁₇Numa, anda o Mileto o Paul tradias te roden ande o Efese le puranen katar e Khangeri. ₁₈Kana von aresle karing leste, vo phenel lenge: Tume žianen sar me kerdem, de katar o mai angluno dies kai me avilem ande e Azia, me či ašilem t'avav tumensa. ₁₉Služisardem le Bares ande muřo kovlimos, ai maškar le zumaimata ai le roimata kai vazdine pe mande le Židovuri. ₂₀Tume žianen ke me či garadem khanči tumendar so trubul, ai ke me či darailem te dav duma ai te sikiarav tume angla o narodo ai ande le khera, ₂₁phendem le Židovonge ai le Grekonge te kein pe karing o Del ai ka o patiamos ande amaro Rai o Jesus Kristo. ₂₂Ai akana eta, phanglo katar o Duxo, me žiav ande o Jerusalem ai či žianav so avela mange; ₂₃ferdi, foro forostar, o Svinto Duxo phendias mange ke phanglimata ai bedi ažiukeren ma. ₂₄Numa či lav sama mandar či jekh fialo anda muřo traio, sar t'avel mange kuč, ferdi te kerav muřo drom veselimasa, ai e ministeria kai me lem katar o Rai Jesus, te phenav e laši viasta ai šukar katar o Del.

₂₅Ai akana eta, me žianav ke tume či mai dikhena muřo mui, tume sa maškar save me dem duma pa e amperetsia le Devleski. ₂₆Sa anda kudia me phenav tumenge adies ke me sim vužio anda sa tumaro rat, ₂₇ke me phendem tumenge sa so sikiarel o Del, khanči garavav. ₂₈Len tume sama tumendar, ai pe sa kudala pe save o Svinto Duxo thodias tumen, te len sama katar e Khangeri le Bareski, kai vo kjindias pe pesko rat. ₂₉Me žianav ke avena maškar tumende, pala ke me žiavatar, ruva bengeske kai rimon le bakrořen, ₃₀ai kai vazdena pe maškar tumende manuš kai sikiarena dieli žiungale, te ningeren le vortakon pala pende. ₃₁Len tume sama, den tume godji ke, pašte trin berš, me či ašilem či riate ai či diese te sikiarav tumen asvensa sakones anda tumende.

₃₂Ai akana me dav tume ka o Del ai ka e vorba leski šukarimaski, ka kudo kai šai zuriarel ai del tumenge sa le svintsimasa. ₃₃Me či kamlem či love, či sunakai, či tsalia khanikastar. ₃₄Tume inke žianen ke kakala vast dine so trubul ma ai kudalen kai sas mansa. ₃₅Me sikadem tumenge anda sako fialo ke si te keren butji kadia ke te ninkeren le kovlen, ai te den tume godji ka e vorba le Bareski, kai vo phendias: Mai but si veselia te den sar te len.

₃₆Pala ke dias duma kadia, vo thodias-pe pe čangende, ai řudjisardias lensa savořensa. ₃₇Ai sa lias len o roimos, ai, xukle pe e koř le Pauloski, von čimide les, ₃₈nekežime mai but ke vo phendias ke či mai dikhena lesko mui. Ai von ningerde les ži ka o čuno.