Apostoli 11

₁Le apostoli ai le phral kai sas ande e Judea ašunde ke le nai-Židovuri vi von line e vorba le Devleski. ₂Ai kana o Petri anklisto ande o Jerusalem, le čače šinde nai lenge mišto. ₃Phenenas: Tu dian andre ka kudala kai nas šinde, ai tu xalian lensa. ₄O Petri thodias pe te phenel lenge sar sa nakhlias.

₅Vo phenel: Me simas ande o foro o Jope, ai žikin me řudjivas, me pelem sar ande jekh suno ai dikhlem jekh dikhimos: Jekh diela, jekh fiala sar jekh baro tsolo phanglo katar le štar koltsuri, vulelas anda o čeri ai avili ži mande. ₆Le dikhimata thodine pe kudo tsolo me lavas sama, ai me dikhlem le žigeni štare punřensa la phuviake, le žigeni sirbati, le sapa, ai le čiriklia le čereske. ₇Ai me ašundem jekh hango kai phenelas mange: Ušti, Petri, mudar ai xa. ₈Numa me phendem: Niči, Baria, ke šoha či mahrime či bi-vužio či dias ande muřo mui. ₉Ai pe e duito data o hango ašundilias ande o čeri: So o Del phendias ke si vužio, tu na dikh pe leste ke si mahrime. ₁₀Kudia areslias trivar; porme sa sas lino ande o čeri. ₁₁Ai eta, strazo trin manuš, tradine anda o Tsesarea karing mande sikadile angla o vudar ka o kher kai me simas. ₁₂O Duxo phendias mange te žiavtar lensa bi t'ažiukerav. Le šov phral sas mansa, ame diam andre ande o kher ka o Kornelius. ₁₃Kudo manuš mothodias amenge sar vo dikhlias ande pesko kher le andželos kai sikadilo leske ai phenelas: Trade ande o Jope, ai an le Simon, kai akharen les Petri, ₁₄kai phenela tuke dieli katar save tu avesa skipime, tu ai sa tjiro kher. ₁₅Kana me thodem ma te dav duma, o Svinto Duxo vulisto pe lende, sar pe amende angla savořende. ₁₆Ai me dem ma godji ka kadia vorba le Bareski: O Jono boldias ande o pai, tume avena bolde ande o Svinto Duxo. ₁₇Eta, sar o Del dias len sa jekh fialo so dias amen kai patiam ande o Rai o Jesus Kristo, sar daštiva me, me, te na kerav pe le Devleski?

₁₈Pala ke ašundias kudia, von ašile, ai luvudisarde le Devles, phenenas: O Del dias kudalen kai či patian te kein pe, eta t'avel len o traio.

₁₉Kudala kai geletar pala o maribe kana mudarenas le Stefano, gele ži ande e Fenesia, ande e inzula o Kipro, ai ande o Antioxi, phenenas e vorba ferdi le Židovonge. ₂₀Numa sas maškar lende uni manuš anda o Kipro ai anda e Sirena, kai, avile ande o Antioxi, pušenas katar le Židovuri kai denas duma grekitsko, ai phenenas lenge e laši viasta katar o Rai Jesus. ₂₁O vast le Baresko sas lensa, ai but anda lende patian ai ambolde pe ka o Baro.

₂₂O hango avilo ka le kan ka kudala kai sas ande e khangeri ande o Jerusalem, ai von tradine le Barnabas ži ande o Antioxi. ₂₃Kana vo areslo, ai dikhlias o mištimos le Devlesko, vo veselisailo, ai vo mangel lendar sa te bešen ande jekh ilo phangle zurale ka o Baro. ₂₄Ke vo sas jekh manuš lašio, pherdo Svinto Duxo ai patiamos. Ai baro narodo avile ka o Baro.

₂₅O Barnabas gelo atunči ande o Tarsus, te rodel le Saul; ₂₆ai, kai arakhlias les, vo andias les ande o Antioxi. Sa ande jekh berš, von kjidenas pe ande jekh than le kavrensa ande e khangeri, ai von sikiarenas but ženen. Sas ande o Antioxi ke e mai angluno data, le vortača akharde le Kristianuri.

₂₇Ande kudia vramia, profeturi vuliste anda o Jerusalem ande o Antioxi. ₂₈Jekh anda lende, bušol Agabus, uštilo, ai phenel katar o Duxo ke avela jekh bari bokh pe sa e phuv. Voi aresli, čačes, kana sas amperato o Klodo. ₂₉Le vortača dine pe duma te traden love, de so vo daštin, t'ažutin le phralen kai bešen ande e Judea. ₃₀Von trade le love ka le phure katar le vast le Barnabaske ai le Sauloske.