2 Timoteo 1

₁O Paul, apostolo katar o Jesus Kristo, sar kamel o Del, te phenel so avela o traio kai si ande o Jesus Kristo, ₂ka o Timoteo, muři glata pria drago:

ke o mištimos, e mila ai e patia te aven tuke dine katar o Del ai katar o Jesus Kristo amaro Baro!

₃Me naisiv le Devles, kai služisarav ai kai muře niamuri služisarde jekha godiasa vuži, ke si riate ai diese ke me dav ma godji sakda tute ande muře řudjimata, ₄dav ma godji ka tjire asva, ai kamavas te dikhav tu eta t'avav pherdo veselia, ₅garadem o gindo čačo katar o patiamos kai si ande tute, kai bešelas angla savořende ande tjiri mami e Lois ai ande tjiri dei e Eunisi ai kai, me sim siguro, bešel ande tute. ₆Sa anda kudia me vazdav tut te des pařa o dinimoske kai tu lian katar o Del kai thodem pe tute le vast. ₇Ke nai jekh duxo lažiavesko kai o Del dias amen, numa jekh duxo zuralo, kamimasko ai godiako. ₈Te na avel tuke lažiav te des duma pa o Baro, či pa mande lesko řobaš. Numa kjinuisavo mansa pala e Laši Viasta, katar e zor le Devleski, ₉kai skipisardias amen, ai akhardias amen pesko narodo, na pala amare butia, numa sar vo kamel, ai sar si o mištimos kai si dino ande o Jesus Kristo le vramiansa pe sakda, ₁₀ai kai sikadilo akana katar amaro Rai o Jesus Kristo, kai phařadias e martia ai sikadias so si o traio kai či merel katar e Laši Viasta.

₁₁Si pala kudia Laši Viasta ke me sim thodino te dav duma ai te avav apostolo; thodino te sitiarav kudalen kai či patian. ₁₂Ai si pala kudia ke me kjinuiv kudala dieli; numa nai mange lažiav, ke me žianav ande kaste me patiaiem, ai me sim siguro ke si les e zor te garavel so si muřo ži adies. ₁₃Ninker ande o patiamos ai ande e mila kai si ande o Jesus Kristo ai le sar te sikaves le čače vorbi kai tu lian mandar. ₁₄Le sama o lašio dinimos so dine tu te garaves, katar o Svinto Duxo kai bešel ande tute.

₁₅Tu žianes ke sa kudala kai si ande e Azia mukle ma, maškar save o Figelo ai o Hermogenes. ₁₆Ke o Baro thol peski mila pe o kher katar o Onisiforo, ke vo butivar lias mandar sama, ai leske nai lažiav katar muře lansuri. ₁₇Aver fialo, kana vo avilo ande e Roma; vo rodias ma gribimasa, ai vo arakhlias ma. ₁₈Ke o Baro te del les te arakhel e mila paša o Baro ande kudo dies. Tu žianes mai mišto sar le kaver sar vo ažutisardias man.