2 Tesalonisianuri 3

₁So mai si, phralale, řudjin amenge, eta ke e vorba le Bareski te žial angle ai t'avel vestime sar si ande tumende, ₂eta ame t'avas skipime katar le manuš nasul ai bengeske; ke sa nai len o patiamos.

₃O Baro si čačo, vo ninkerela tumen ai arakhela tumen katar o xitro. ₄Amen si ame karing tumende kudo patiamos ande o Baro ke tume keren ai ke tume kerena dieli kai ame diam tumen poronka.

₅Ke o Baro te tradel tumare ile karing o kamimos le Devlesko ai karing o ninkerimos le Kristosko.

₆Ame phenas tumenge, phralale, ande o anav amare Baresko o Jesus Kristo, te durion katar sako phral kai trail ande o dilimos, na sar le sikimata kai tume lian amendar. ₇Tume inke žianen sar tume trubul te keren sar amende, ke ame či traisardiam maškar tumende ande o dilimos. ₈Ame či xalian o manřo khanikasko ivia; numa, anda e butji ai anda o kjino, ame samas riate ai diese ande e butji, te na avas phare pe či jekh anda tumende. ₉Nai ke nas amen o zakono, numa ame kamliam te sikavas tumenge te keren sar amende. ₁₀Ke, kana ame samas tumende, ame phendiam tumenge naročno: Te si varekon te na kamel te kerel butji, vi te na xal.

₁₁Ame ašundiam, numa, ke si maškar tumende uni kai train ande o dilimos, kai či keren butji, numa kai keren so či trubul te keren. ₁₂Ame mangas kudale ženen, ai ame mothas len katar o Rai o Jesus Kristo, te xan von pengo manřo, te kerel butia mišto.

₁₃Tumenge, phralale, na muken tume te na keren o mištimos. ₁₄Ai t'avela varekon ke či patial so ame phenas ande kado lil, len lesko anav, ai te na avel tumen khanči lesa, eta t'avel leske lažiav. ₁₅Na dikhen pe leste sar pe jekh dušmano, numa phen leske sar jekh phral.

₁₆Ke o Baro la patiako te del tumen vo e patia ande sa le vrami, ande sako fialo! Ke o Baro t'avel tumensa savořensa!

₁₇Me dav tumen pozdraimos, me o Paul, anda muřo čačo vast. Si muři signatura ande sa muře lila; kadia me ramosarav.

₁₈Ke o mištimos katar amaro Rai o Jesus Kristo t'avel tumensa sa.