2 Korintianuri 6

₁Sar ame keras butji le Devlesa, ame mangas tumen te na len o mištimos le Devlesko intaino.

₂Ke vo phenel:

Eta akana si e vramia kai trubul, eta akana o dies le skipimasko.

₃Ame či das či jekh diela skandalo ande so avela, eta ke e ministeria te na avel jekh diela asaimaski. ₄Numa ame kamas t'avas karing sa sar mai mišto, sar služi le Devleske, katar but te nirisaras so avel amenge, ande le nasulimata, ande le nekazuri. ₅Maren amen, thon amen ande le temnitsi, bulguin pe karing amende, kerdiam, butia phare, arakhliam e riate, ande le postimata; ₆katar amaro vužimos, amaro žianglimos, amaro ažiukerimos, katar o lašimos, katar o Duxo Svinto, katar amaro čačo kamimos, ₇katar e vorba le čačimaski, katar e zor le Devleski, katar le armi kudalensa arakhas ame ai te maras ame; ₈maškar o vestimos ai o nekazo, maškar o prasaimos ai o luvudimos; dikhen pe amende sar t'avas xoxamne, makar ke sam čače; ₉sar te na prinžiaren ame, makar ke prinžiaren ame, sar merimaske, ai eta ame traisaras, sar došale, makar ke či mudaren amen; ₁₀sar nekežime ame sam sakda veseli, sar čoře ame barvaras buten; sar te nai amen khanči, ai ame line sako diela.

₁₁Amaro mui puterdilo tumenge, Korintianuri, amaro ilo si phukiardo. ₁₂Ame či phandaliam tumenge amaro ilo; numa tume phandalian tumaro. ₁₃Keren amensa sa kadia — me dav duma tumensa sar ka muře glati — phukiaren tume!

₁₄Na thon tume kudalensa kai či patian. Ke so šai avel maškar e kris ai e bezex? Vai so si len jekh avresa e vedaria ai o tuniariko? ₁₅So šai avel len jekh avresa o Kristo ai o Belial? vai če partia šai t'avel o čačo le bi čačesa? ₁₆Ke so šai t'avel maškar o templo le Devlesko ai le staturi? Ke ame sam o templo le Devlesko živindo, sar o Del phendias: