2 Korintianuri 13

₁Me žiav tumende pe e trito data. Sako diela lašiardiola sar phenena dui vai trin martururi. ₂Kana me simas tumende e duito data, me phendemas, ai adies, kai me či sim kothe, me phenav pale kudalenge kai kerde bezexa angla savořende ai sa le kavrenge ke, t'avava me palpale tumende, či khonik našela katar o strafo. ₃Sar tume roden jekh marturia te dikhen ke o Kristo del duma ande mande, vo kai nai kovlo karing tumende, numa kai si zuralo maškar tumende. ₄Ke vo sar karfome pala pesko kovlimos, numa vo trail katar e zor le Devleski; vi ame, ame sam kovle ande leste, numa ame traisarasa lesa katar e zor le Devleski te keras karing tumende.

₅Len tume sama tumen, te dikhen te san ande o patiamos. Zumaven tume tumen. Či prinžiaren tume ke o Kristo si ande tumende? vai ke tume sanas šiudine. ₆Numa me gindiv ma ke tume žianen ke ame, ame či sam šiudine. ₇Numa ame řudjisaras le Devles ke tume te na keren khanči nasul, na te sikavavas ame ke sam laše, numa ke tume te keren so si mišto ai ke ame, t'avas sar šiudine. ₈Ke ame nai amen zor karing o čačimos; amen si ame zor ferdi pe o čačimos ₉Ame veselisavas kana ame sam kovle, žikin tume san zurale; ai eta ame mangas ande amare řudjimata, ke tume te aresen mai čače. ₁₀Sa anda kudia me ramosarav kadala dieli makar ke či sim kothe, eta ke, kana avava, či mai trubul te kerav zurales, pala e putiaria kai o Baro dias ma, te sikiarav ai na te rimov tumen.

₁₁So mai si, phralale, aven ande e veselia, sikion mai but, ažutin tume, te keren sa jekh fialo, train ande e patia; ai o Del le dragosko ai la patiako avela tumensa.

₁₃Ke o šukarimos katar o Rai o Jesus Kristo, o kamimos le Devlesko, ai so del o Svinto Duxo, t'aven tumensa sa!