2 Korintianuri 11

₁O! te šai ninkerena tume mandar jekh tsiřa dilimos! Numa tume ninkerena ma! ₂Ke me sim žaluzo anda tumende sar e žaluzia katar o Del, ke me tomnisardem tume ka ferdi jekh řom, te sikavav tumen ka o Kristo sar jekh pativali šei vuži. ₃Kaver data, sar ke o sap diliardias la Eva xitreniasa, mange si dar ke tumare ginduri rimon pe ai den pe rigate katar e prosto diela le Kristoski. ₄Ke, te si varekon avel te del duma jekh aver Kristo ke sar kudo pa kaste ame diam duma, vai te lena tume jekh kaver Duxo ke sar kudo kai tume lian, vai jekh kaver Laši Viasta sar kudo kai tume lian, tume ninkerdian les mišto.

₅Eta, me gindiv ma ke me či simas mai kovlo ande khanči katar kudala apostoli kai si laše. ₆Te me či žianav sar te dav duma, či sim me kadia te na žianav, ai me sikadiam les karing tumende ai ande sa le dieli.

₇Vai kerdem me jekh bezex kana, me teliardem ma korkořo eta ke tume t'ušten? Me dem tumen ivia e Laši Viasta le Devleski ₈Me lem pa le kaver khangeria kai lem lendar jekh pokjinimos, te služiv tumen. ₉Ai kana me simas tumende ai kai trubulas ma vareso, me či thodem pharimos pe khanikaste; ke le phral kai avile anda e Makedonia dine man so trubul man. Ande sa le dieli me lem ma sama te na bešav pe tumende, ai me lem ma sama. ₁₀Katar o čačimos anda o Kristo kai si ande mande, me phenav ke kudo vestimos či lena les mandar ande e rig katar e Gretsia. ₁₁Sostar? Si ke me či kamav tumen? O Del žianel!

₁₂Numa me kerav ai kerava kadia, te lav sa katar kudala «apostoli» kai den duma kai roden te luvudin pe, eta t'aven sar amende ande le dieli kai von keren. ₁₃Kudala manuš si xoxamne apostoli, butiara kai athaven, uriade pe sar le apostoli le Kristoske. ₁₄Ai kadia nai šodo, ke vi o Satan uriadias pe sar jekh andželo la vedariako. ₁₅Nai kadia šodo ke kudala ministeri vi von uriaven pe sar le ministeri la krisake. Lengo getomos avela sar si lengi butji.

₁₆Me mai phenav, ke khonik te na dikhel pe mande ke sim dilo, eta ke vi me, tu luvudiv ma jekh tsiřa. ₁₇So me phenav, siguro sim so me šai luvudiv ma, či phenav me kadia sar mangel o Baro, numa sar jekh dilo. ₁₈Sar ke si but kai luvudin pe sar si o mas, vi me si te luvudiv ma. ₁₉Ke tume ninkeren mišto le dilen, tume kai san godiaver. ₂₀Te si varekon te peravel tumen, te si varekon te xal tumen, te si varekon te lel tumen, te si varekon barimatango, te si varekon te marel tumaro mui, tume ninkeren les. ₂₁Lažiav mange te phenav, ame sikadiam amaro kovlimos.

Numa, sogodi šai tromal varekon — me dav duma sar dilo — vi me, tromav! ₂₂Si von Hebreuri? Vi me. Si von Israelituri? Vi me. Vulen vo katar o Abraham? Vi me. ₂₃Si von ministeri le Kristoske? Me dav duma sar jekh manuš kai či žianel so phenel. Me sim mai but; katar le butia, mai but; katar le dukhuma, mai but; katar le temnitsi, mai but. Butivar ande e dar le merimaski. ₂₄Panž-var me lem katar le Židovuri trianda ai enia dukhuma, ₂₅trivar marde man le rovliansa, jekh data marde man le bařensa, trivar sas te tasuvav, me nakhlem jekh dies ai jekh riat ande e maria. ₂₆Butivar pe o drom, me sas te xasavav pe le paia, sas te xasavav katar le řobaša, sas te xasavav katar kudala anda muřo them, sas te xasavav katar kudala kai či patian, sas te xasavav ande le foruri, sas te xasavav ande le kimpuri, sas te xasavav pe e maria, sas te xasavav maškar le falši phral. ₂₇Me simas ande e butji ai ande o nekazo, but riatia či sutem, butivar či xalem ai či pilem, postisardem butivar, simas pe o šil ai pe o nangimos. ₂₈Ai, bi te dav duma pa le kaver dieli, si thodino pe mande sako dies le ginduri kai den ma sa le Khangeria. ₂₉Kon si kovlo, te na avav me kovlo? Kon si te perel tele, te na me phabuvav?

₃₀Te trubul te luvudisaras ame, si ande muřo kovlimos ke me luvudiv ma! ₃₁O Del, kai si o Dad le Baresko o Jesus, ai kai svintsil pe sakda, vo žianel ke me či xoxavav! ₃₂Ande o Damasko, o vladoro katar o amperato Aretas kerdias te arakhen o foro katar le Damasianuri, te len man; ₃₃numa uliarde man katar jekh feliastra, ande jekh košnitsa, o lungo le zidosko, ai me skipisailem anda lenge vast.