1 Tesalonisianuri 3

₁Sa anda kudia, sar ame našti mai ažiukerasas, ai ame diam ame godji te bešas ande e Atena, ₂ame tradiam le Timoteo, amare phrales, ministero le Devlesko ande e Laši Viasta le Devleski, te ninkerel tumen ai te zuriarel tumen ande tumaro patiamos, ₃eta ke khonik te na miškil tumen maškar le buntuimata kai si akana, ke vi tume žianen ke ame sam šinade pe kudia. ₄Ai kana ame samas paša tumende, ame phendiam tumenge angla savořende ke ame avasa pe o marimos, sar vi areslias, ai sar tume žianen. ₅Kadia, sar me našti mai ažiukeravas, me tradem le Timoteo te žianav sar si tumaro patiamos, daratar ke kudo kai zumavel te na zumavel tumen, ai ke ame si te kerdiam butji pe intaino.

₆Numa o Timoteo, nai de dumult areslo kathe tumendar, dias ame laše vasti katar tumaro patiamos ai katar tumari mila, ai vo phendias amenge ke tumen si tume sakda jekh lašio gindo amendar, ai kamen te dikhen ame sar vi ame kamas te dikhas tumen. ₇Pala kudia, phralale, maškar sa amare nasulimata ai amare buntuimata, amenge si mišto anda tumende, sar ke tume patian. ₈Ke akana ame traisaras, sar tume bešen zurales ande o Baro. ₉Sar ame šai naisaras le Devles pala tumende, pala sa e veselia kai tume den amen, angla amaro Del! ₁₀Riate ai diese, ame řudjisaras les jekh baria zorasa te mukel ame te dikhas tumen, ai te getosaras so mai trubul tumen.

₁₁Ke o Del inke vo, amaro Dad, ai amaro Rai o Jesus, te lašiarel amaro drom ke t'ame te žias tumende! ₁₂Ke te o Baro butiarel but mai but maškar tumende, ai karing sa, kudia mila kai sas amen karing tumende, ₁₃eta te zuriarel tumare ile te na aven došale ande o svintsimos angla o Del amaro Dad, kana avela amaro Rai o Jesus sa peske svintsonsa.