Lucca 12

₁In issu mentri s'era accolta a folla à millai, à tal puntu ch'elli si calcicavanu; Ghjesù parledi prima à i so discepuli: «attenti à u levitu di i Farusei, chì hè a falsità. ₂Ùn ci hè nulla di piattu chì ùn abbii da vena palesu, nulla di sicretu chì ùn abbii da vena sappiutu. ₃Chì tuttu ciò chì voi eti dittu in lu bughju sarà intesu in la luci, è ciò chì voi eti dittu à l'arechja in cantina, sarà pruchjamatu da i tarrazzi.»

₄«A vi dicu, à voi i me amichi, chì voi ùn temiti quilli chì tombanu a parsona ma ùn ponu fà nulla di più. ₅Vi faraghju veda quillu chì hè da tema: timiti lu, quillu chì dopu d'avè tombu hà u puteri di lampà vi in infernu; iè, a vi dicu, timiti à ellu. ₆Ùn si vendinu cinqui passuli par dui soldi? Ma Diu ùn si ni sminteca mancu una. ₇Ancu i capelli chì voi aveti in capu sò conti tutti. Ùn timiti: valeti po più voi cà parechji passuli.»

₈«A vi dicu, à chì mi ricunnusciarà davanti à l'omi, ancu u Figliolu di l'Omu u ricunnusciarà davanti à l'agnuli di Diu. ₉Ma à chì m'avarà nicatu davanti à l'omi, sarà nicatu davanti à l'agnuli di Diu. ₁₀È à quillu chì parlarà contru u Figliolu di l'Omu, li sarà pardunata; ma à quillu chì avarà ghjastimatu contru à u Spiritu Santu, ùn li si pardunarà. ₁₁È quand'elli vi purtaranu da ghjudicà vi, davanti à i sinagoghi, i capipopuli è i puteri, ùn vi frasturneti par sapè cum'è voi v'eti da difenda o ciò chì voi eti da dì: ₁₂Chì tandu a vi insignarà u Spiritu Santu ciò ch'ellu ci voli à dì.»

₁₃È unu chì era à mezu à a folla li dissi: «o Maestru, dì à me fratellu ch'ellu mi dia a me parti di a nostra robba.» ₁₄È Ghjesù li dissi: «o amicu, quali m'hà fattu ghjudici o spertu pà i vostri affari?» ₁₅È dissi à tutti: «siati guardinchi è attenti à ogni brama di ricchezza: ùn hè micca parchì un omu hè riccu chì a so vita hè prutetta da a so robba.» ₁₆È li dissi una parabula: «un riccu avia una tarra chì avia datu u granu in quantità. ₁₇È dicia da sè à sè: “cumu avaraghju da fà, chì ùn aghju locu da tena u me granu?” ₁₈È po dissi: “eccu ciò ch'e' aghju da fà, aghju da spiantà i muri di i me granaghji è fà li più maiò, è ci accatamansaraghju tuttu me granu è tutta a me robba. ₁₉È mi diciaraghju: ai robba accantata par parechji anni; riposa ti puru, magna, bii è godi.” ₂₀Ma Diu li dissi: “o scemu, sta notti ti sarà ripigliata a to vita. Tuttu ciò chì tù ai appruntatu, da quali sarà?” ₂₁Hè listessa par quillu chì s'ammansa un tisoru da sè stessu, ma par Diu riccu ùn hè.»

₂₂È dissi à i so discepuli: «par quissa a vi dicu: Ùn vi primureti pà a vostra vita di ciò chì voi eti da magnà, nè pà a vostra parsona di cum'è vo sareti vistuti. ₂₃Chì a vita hè di più cà u magnà, è a parsona hè di più cà a vistitoghja. ₂₄Guardeti i corbi chì nè sumenanu nè seganu granu, ùn anu nè cantina nè granaghju, ma Diu li dà da magnà; è voi valeti altru cà l'acelli! ₂₅Quali di voi, cù i so pinseri, pò fà crescia d'un palmu u tempu di a so vita? ₂₆Cusì si voi ùn pudeti nulla mancu par issu suppulellu, chì andeti à primurà vi di l'altri cosi? ₂₇Guardeti i gigli cum'elli crescinu; nè travaglianu nè tessinu; ma a vi dicu, mancu Salamoni in tutta a so gloria fù vistutu cum'è unu d'elli. ₂₈È sì Diu vesti cusì l'arba, chì oghji hè ind'u pratu è dumani sarà lampata ind'u fornu, quantu di più a farà par voi, o ghjenti di poca fedi! ₂₉È ùn circheti puru ciò chì voi eti da magnà è da bia è ùn vi frasturneti. ₃₀Tutti sti cosi, i cercanu l'omi di issu mondu, ma à voi u vostru Babbu a sà ch'elli vi accorrinu. ₃₁Circheti piuttostu u so Regnu, è què vi sarà datu in soprappiù. ₃₂Ùn timiti, picculu tagliolu, chì u vostru Babbu hà dicisu di dà vi u Regnu. ₃₃Vinditi a vostra robba è feti ni a limosina; feti vi borsi chì ùn si frustanu, un tisoru in li celi chì ùn pò spariscia, chì nè u latru ci si avvicina, nè a tignola ci si metti. ₃₄Chì duva ellu hè u vostru tisoru, culà sarà ancu u vostru cori.»

₃₅«Cigniti vi a vita è tiniti i lumeri accesi. ₃₆Siati cum'è l'omi chì aspettanu ch'ellu volti u patroni da un matrimoniu, par apra li da ch'ellu ghjugnarà è pichjarà. ₃₇Biati issi servi, chì u patroni truvarà svegli à u ghjugna! Da veru a vi dicu, si cignarà a vita pà u travagliu, i farà attavulinà, è vinarà à serva li, ₃₈è s'ellu ghjugni à mezanotti o à trè ori di mani, è truvà li svegli, biatu puru à elli. ₃₉Sappiati chì s'ellu sapessi u patron di casa à chì ora ch'ellu hà da vena u latru, mancu po u lasciaria entra à abbuttà li a casa. ₄₀È voi siati pronti, chì u Figliolu di l'Omu vinarà à l'ora chì voi ùn pinseti.»

₄₁È Petru dissi: «o Signori, a dici da noi soli issa parabula, o da tutti?» ₄₂È u Signori dissi: «qualessu hè u intindenti fidu è sinnatu, chì u patroni li darà u guvernu di a so casa da ch'ellu dii à ugnunu a so parti di u granu, quand'ellu ci voli? ₄₃Biatu quillu servu, chì à u ghjugna u patroni u truvarà chì faci cusì! ₄₄Da veru a vi dicu, li darà u guvernu di tuttu u soiu. ₄₅Ma s'ellu dici quillu servu da sè à sè: “u me patroni ùn hè ancu à vultà”; è metti à minà i ghjuvanotti è i ghjuvanetti, à magnà è bia è imbriacà si, ₄₆vultarà u patroni di issu servu u ghjornu ch'ellu ùn l'aspittarà è à una ora ch'ellu ùn saparà, u ghjucarà à pezzi è u trattarà cum'ellu si faci à a ghjenti infida. ₄₇U servu, chì hà sappiutu ciò ch'ellu vulia u patroni è ùn hà appruntatu nè fattu sicondu u so vulè, i colpi i ricivarà assai. ₄₈Ma quillu chì ùn hà sappiutu è chì hà miritatu i colpi ni ricivarà pochi; à quillu chì hà ricivutu assai, assai li si dumandarà; à quillu chì li hè statu datu assai, ancu di più li si hà da chera.»

₄₉«U focu, sò vinutu à lampà in la tarra, è ùn vegu l'ora ch'ellu sia dighjà accesu! ₅₀Devu riceva un battezimu, è quantu mi trega ch'ellu sii cumpiitu! ₅₁Pinseti ch'e' sii vinutu à dà a paci à u mondu? Micca a paci, a vi dicu, ma a divisioni. ₅₂Chì oramai, s'elli sò cinqui in una casa si dividaranu, trè contru à dui è dui contru à trè.

₅₄È dissi à a ghjenti accolta: «quand'ì voi videti un nivulu chì si alza à punenti, diti subitu: “avemu l'acqua”, è cusì hè; ₅₅è quand'ellu soffia u sciroccu, diti hà da essa u caldu, è cusì hè. ₅₆O falsi! Ciò chì si vedi di a tarra è di u celi, vi ni sapeti avveda; è st'epica nostra cumu hè chì voi ùn vi ni avviditi?»

₅₇«Parchì ùn ghjudicheti da par voi di u ghjustu? ₅₈Cusì quand'ì tù vai ind'è u ghjudici cù quillu chì t'accusa, prova à metta ti d'accunsentu cun ellu par istrada, da ch'ellu ùn ti trascinghi davanti à u ghjudici, chì u ghjudici ùn ti metti in mani à i pulizzeri, è quilli purtà ti in prighjoni. ₅₉A ti dicu, ùn ni isciarè fin chì tù ùn avarè pacatu sinu à l'ultimu soldu.»