CAP. XVIII.
1In quellu mumentu s’ avvicinonu li discipuli a Ghiesù, e li dissinu: Qual pensi, che sii lu più grande in lu regnu di li celi?
2E Ghiesù chiamandu un zitellu, lu pose a mezu ad elli,
3E disse: Vi dicu in verità, se nun vi cunvertite, e nun turnate come li zitelli, nun intrarete in lu regnu di li celi.
4Quellu, che si farà chiucu come stu zitellu, quellu sarà lu più magghiò in lu regnu di li celi.
5E quellu, che accugliarà un zitellu come quessu in nome meiu, accoglie a me stessu.
6Ma quellu, che scandalizarà unu di sti chiucarelli, che credunu in me, li cunvene megliu, ch’ ellu s’ appendi a lu collu una macina da sumere, e ch’ ellu si ghietti in lu prufondu di lu mare.
7Guai a lu mondu per causa di li scandali. È necessariu, che ci siinu di li scandali; ma guai a l’ omu, per colpa di lu quale arriva lu scandalu.
8Se la to manu, o lu to pede ti dannu scandalu: tagliali, e ghiettali luntanu da te: è megliu per te intrà in la vita debule, o sciancu, che d’ avè le dui mani, e li dui pedi per essa poi ghittatu in lu focu eternu.
9E se lu to ochiu ti scandaliza, cacciatilu, e ghiettalu luntanu da te: è megliu per te d’ intrà in la vita cun un ochiu solu, che d’ avè dui ochi, e d’ essa ghittatu in lu focu di l’ infernu.
10Badate di nun sprezzà unu di sti chiuchi: perchè vi dicu, che li so’ agnuli in li celi vedunu sempre la faccia di u me Babbu, ch’ è in li celi.
11Ed in fatti lu Figliolu di l’ omu è ghiuntu per salvà ciò, ch’ era perdutu.
12Che vi ne pare? Se unu, che ha centu pecure ne smarrisce una: nun lasciarà ellu li nuantanove sopra lu monte, per andà a circà quella, che s’ è persa?
13E se l’ accade di ritruvalla: vi dicu in verità, si rallegrarà più sopra di quessa, che sopra li nuantanove, che nun si eranu smarrite.
14Cusì è la vuluntà di lu vostru Babbu, ch’ è in li celi, che nun si perdi unu di sti chiucarelli.
15Se lu to fratellu ti ha mancatu, vai e curreghilu a solu a solu. S’ ellu ti sta a senta, aurè guadantu lu to fratellu.
16Ma se ellu nun ti sta a senta, porta cun te unu, o dui, perchè tutti li detti si passinu fra dui, o tre tistimonii.
17Ma se ellu nun ne face contu, dillu a la ghiesa. E s’ ellu nun sta a senta mancu la ghiesa, che ellu sii per te come un ghientile, e un pubblicanu.
18Vi dicu in verità, tutte le cose, che ligarete sopra la terra, sarannu ligate in lu celu: e tutte quelle, che sciugliarete sopra la terra, sarannu sciolte in lu celu.
19Vi dicu ancora, che se dui di voi altri cascanu d’ accordu per dumandà una cosa qualunque, lu me Babbu, che è in lu celu li l’ accurdarà.
20Perchè, induva dui, o tre so’ riuniti in nome meiu, culà eiu mi trovu in mezu ad elli.
21Allora Petru essendusi avvicinatu, li disse: Signore, quante volte putragghiu perdunà l’ uffesa di lu me fratellu? finu a sette volte?
22Ghiesù li rispose: Nun ti dicu finu a sette: ma finu a sittanta volte sette.
23Perciò lu regnu di li celi si assumiglia ad un re, che volse fà conti cun li so’ servitori.
24E quandu ellu principiava a fà conti, li ne presentonu unu, che li duvia decimila talenti.
25Ma siccome ellu nun avia di che pagà, lu so patrone cumandò, ch’ ellu fusse vindutu cun la moglie, e li figlioli, e tuttu ciò, ch’ ellu avia, per putè essa pagatu.
26Ma u servitore ghinuchione a li so’ pedi, u pregava dicendu: Abbi pacenza, ed eiu ti pagaragghiu tuttu.
27E lu patrone avendu pietà d’ ellu, lu mandò via, scaricandulu di lu debitu.
28Ed essendu surtitu lu servitore, truvò unu di li so’ cumpagni, che li duvia centu danari: e pigliatulu pe a gola u strangulava dicendu: Rendi ciò, che tu devi.
29E lu cumpagnu ghinuchione a li so’ pedi, lu pregava, dicendu: Abbi pacenza, e ti rindaragghiu ciò, che ti devu.
30Ma ellu nun volse accunsenta: ed andò a fallu metta in prighiò, fintantu ch’ ellu nun avesse pagatu lu so debitu.
31Ma li so’ cumpagni avendu vistu sti fatti, si ne afflissinu assai: e andonu a raccuntà a lu patrone tutti li fatti, ch’ eranu accaduti.
32Allora lu patrone lu mandò a chiamà: e li disse: Servu indegnu, t’ agghiu perdunatu tuttu lu to debitu, perchè mi n’ hai pregatu:
33Nun duvii tu avè pietà di lu to cumpagnu, come eiu avia avutu pietà di te?
34E sdignatu u patrone lu misse in manu a li boia, fin tantu ch’ ellu nun avesse pagatu tuttu lu so debitu.
35Cusì lu me Babbu celeste farà a voi, se nun perdunate ugnunu di core a lu vostru fratellu.
