Hebreed 3

₁Dre‐ze, breudeur santel, pere hoc’h euz perz er vocation celestiel, considerit mad an abostol hag ar belegbraz euz ar feiz a anzavomp, ₂Jesus‐Christ, pehini a zo bet fidel d’an hini hen deuz hen etablisset, evel ma oe ive Moises en he holl diegez. ₃Hogen, countet eo bet dign euz a eur gloar dreist hini Moises, evel ma’z eo brassoc’h henor an hini hen deuz savet an ti, eged hini an ti he‐unan. ₄Rag pep ti a zo bet savet gant unan‐benag; hogen, an hini hen deuz savet an holl draou eo Doue. ₅Hag evit ar pez a zell ouz Moises, hennes a zo bet fidel en holl ti Doue, evel servicher, evit rei testeni euz ar pez a dlie beza annonset; ₆mes ar C’hrist, evel eur Mab, a zo bet lakeat da vestr var he di, he‐unan; ni eo he di, gant ma talc’himp stard beteg ar fin ar fizians hag an esperans a bere en em c’hlorifiomp.

₇Rag‐se, evel ma lavar ar Spered‐Santel: ₈Hirio mar klevit he vouez, na galedit ket ho calonou, evel ma c’hoarvezaz pa stourmaz ar bobl ouzin, en deiz an dentation en desert, ₉en pe leac’h ho tadou a dentaz ac’hanoun, hag a amprouvaz ac’hanoun, hag en pe leac’h e veljont va oberou e‐pad daouugent vloaz. ₁₀Abalamour da ze e savaz droug enoun ouz ar generation‐ze, hag e liviriz: Ho c’halon a zeu bepred da fazia, ha n’ho deuz ket anavezet va henchou. ₁₁Evel‐se em euz touet em c’holer, na antreint biken em repos! ₁₂Likit evez, breudeur, na vez en hini ac’hanoc’h eur galon fall ha difeiz, en eur drei kein d’an Doue beo. ₁₃Mes en em exhortit an eil egile bemdez, e‐pad ma’z eo lavaret: Hirio; gant aoun na deufe hini ac’hanoc’h d’en em galedi dre douellerez er pec’hed. ₁₄Rag ni a zo deuet da gaoud lod er C’hrist, mar dalc’homp stard beteg ar fin hon assurans kenta, ₁₅e‐pad ma’z eo lavaret: Hirio, mar selaouit he vouez, na galedit ket ho calonou, evel ma c’hoarvezaz en devez ar stourm. ₁₆Piou, en gwirionez, eo ar re a stourmaz goude beza klevet anezhan, nemed ar re a ieaz er meaz euz an Egypt, renet gant Moises? ₁₇Hag a‐enep piou e oe Doue droug‐contant e‐pad daou‐ugent vloaz; ha n’eo ket a‐enep ar re a bec’haz, hag euz a bere ar c’horfou a gwezaz en dezert? ₁₈Ha da biou e touaz‐hen na antrejent ket en he repos, nemed d’ar re a oa en em zavet a‐enep dezhan? ₁₉Evel‐se e velomp penaos na helljont ket mond en he repos, abalamour ne gredent ket.