II S. Ian 1

₁An Ancien, d’an itron choazet, ha d’he bugale, pere a zo karet ganen‐me er wirionez (ha n’e ket ganen‐me hep‐ken, mes ive gant ar re holl ho deuz anavezet ar wirionez), ₂abalamour d’ar wirionez a choum enomp, hag a vezo ganeomp da virviken: ₃Ra vezo ganeoc’h ar c’hras, an drugarez hag ar peoc’h, euz a‐berz Doue an Tad, hag euz a‐berz an Aotrou Jesus‐Christ, Mab an Tad, er wirionez hag er garantez.

₄Joa vraz em euz bet o veza kavet meur a hini euz da vugale hag a vale er wirionez, hervez ar gourc’hemen hon euz bet digant an Tad. ₅Ha breman e pedan ac’hanoud, itron, n’eo ket evel pa scrivjen d’id eur gourc’hemen nevez, mes an hini hon euz bet adaleg ar pen‐kenta, ma en em garimp an eil egile. ₆Hag ar garantez eo ma valeimp hervez he c’hourc’hemenou. Hennes eo ar gourc’hemen, evel ma hoc’h euz hen klevet adaleg ar pen‐kenta, evit ma valeot enhan. ₇Rag kals a douellerien a zo deuet ebarz er bed, pere na anzavont ket ez eo deuet Jesus‐Christ er c’hig. Eun hevelep den eo an toueller hag an ante‐christ. ₈Likit evez ouzoc’h hoc’h‐unan, evit na gollimp ket ar frouez euz hon labour, mes ma recevimp eur recompans leun. ₉Piou‐benag a dor al lezen ha na choum ket en kelennadurez ar C’hrist, n’ema ket Doue ganthan. An hini a choum en kelennadurez ar C’hrist, gant hennes ema an Tad hag ar Mab. ₁₀Mar deu unan‐benag d’ho kavoud, ha na zigas ket ganthan ar gelennadurez‐ze, n’hen digemerit ket en ho ti, ha na zaludit ket anezhan. ₁₁Rag an hini a zalud anezhan, hen deuz lod en he oberou fall.

₁₂Petra‐benag m’am boa kalz a draou da scriva deoc’h, n’e ket fellet d’in hen ober gant paper ha liou: mes esper em euz da vond beteg enoc’h, ha da gomz ouzoc’h genou ouz genou, evit ma vezo hor joa parfet. ₁₃Bugale da c’hoar choazet a zalud ac’hanoud! Amen.