II Corintied 13

₁Setu aman an derved gwech ma’z an d’ho kavout. Var ger daou pe dri dest e vezo reglet pep tra. ₂Hel lavaret em euz dija, hag hel lavaret a ran c’hoas, evit an eil gwech, evel pa vijen prezant ganeoc’h, petra‐benag ma’z oun breman pell diouzoc’h, d’ar re ho deuz pec’het a‐ziaraog, koulz ha d’ar re all eo e scrivan kement‐man, mar teuan adare, na espernin hini anezhe, ₃pa’z eo gwir e klaskit eur breuven ema ar C’hrist o komz dreizoun‐me, hen pehini n’eo ket sempl en ho kenver, mes a zo galloudus enoc’h. ₄Rag petra‐benag ma’z eo bet crucifiet er zempladurez, koulskoude, ema beo dre c’halloud Doue; ha ni a zo sempl ive assambles ganthan, mes beva a raimp ganthan, dre c’halloud Doue en ho touez. ₅Sellit enoc’h hoc’h‐unan, da velet ha c’houi a zo er feiz; en em eprouvit hoc’h‐unan; ha na anavezit‐hu ket hoc’h‐unan penaos ema Jesus‐Christ enoc’h? nemed reprouvet e vec’h marteze. ₆Mes esper em euz ec’h anavezot penaos evidomp‐ni, n’omp ket reprouvet. ₇Hag e pedan Doue na reot droug e‐bed; nann evit ma seblantfemp beza approuvet, mes evit ma reot ar pez a zo mad, ha pa dlefemp‐ni beza evel reprouvet hon‐unan. ₈Rag n’hon euz galloud e‐bed a‐enep ar wirionez, mes evit ar wirionez. ₉Hag hon euz joa o veza sempl, gant ma, viot krenv; hag ar pez a c’houlennomp digant Doue eo ma teufot da veza parfet. ₁₀Abalamour da ze e scrivan an traou‐man pell diouzoc’h, evit ne rankin ket beza garo, pa vezin tost deoc’h, hervez ar galloud hen deuz roet an Aotrou d’in evit edifia, ha nann evit distruja.

₁₁A‐hend‐all breudeur, bezit leun a joa; klaskit beza parfet; en em gonsolit an eil egile; bezit euz ar memeus santimant; bevit en peoc’h; ha Doue ar peoc’h hag ar garantez a vezo ganeoc’h. ₁₂En em zaludit an eil egile gant eur pok santel. An holl Zent a zalud ac’hanoc’h. ₁₃Gras hon Aotrou Jesus‐Christ, karantez Doue, ha communion ar Spered‐Santel ra vezo ganeoc’h holl! Amen!