I Thessalonied 5

₁Evit ar pez a zell an amzeriou hag ar momanchou, breudeur, n’hoc’h euz ket ezom e vez scrivet deoc’h. ₂Rag c’houi hoc’h‐unan a oar ervad, penaos deiz an Aotrou a zeuio evel eul laer en noz. ₃Rag pa livirint: Peoc’h hag assurans! neuze eun distruj subit a zeuio varnezhe, evel ar gouentrou gant ar vreg a zo brazez; ha na echappint ket. ₄Mes evidoc’h‐hu, breudeur, n’emoc’h ket en devalijen, evit ma teufe an deiz‐ze varnoc’h evel eul laer, ₅rag c’houi a zo holl bugale ar sclerijen, ha bugale an deiz; n’omp ket euz an noz, nag euz an devalijen. ₆Rag‐se na gouskomp ket evel ar re all, mes veillomp ha bezomp sobr. ₇Rag ar re a gousk, a gousk en noz; hag ar re a zeu d’en em vezvi, hen gra en noz. ₈Mes ni pere a zo euz an deiz, bezomp sobr, o veza gwisket gant cuirassen ar feiz, hag ar garantez, ha gant tok‐houarn an esperans euz ar zilvidigez. ₉Rag Doue n’hen deuz ket hon destinet d’ar goler, mes da gaoud ar zilvidigez dre hon Aotrou Jesus‐Christ, pehini a zo bet marvet evidomp, ₁₀evit ma vevimp assambles ganthan, pe ni a vezo dihun, pe ni a vezo kousket. ₁₁Rag‐se roit courach an eil d’egile, hag en em edifiit an eil egile, evel ma her grit ive.

₁₂Hogen, ho pedi a reomp, breudeur, da gaoud respet evit ar re a labour en ho touez, hag a zo lakeat dreist‐hoc’h hervez an Aotrou, hag a zo ouz ho kelen, ₁₃ha da gaoud ar brassa karantez evithe, abalamour d’ho labour. Bezit en peoc’h etrezoc’h. ₁₄Ho pedi a reomp, breudeur, gourdrouzit ar re a zo direiz, consolit ar re a zo dinerz a galon, harpit ar re febl, bezit leun a batianted e‐kenver an holl. ₁₅Diwallit na zeufe hini ac’hanoc’h da renta da zen an droug evit an drouk; mes heullit bepred ar pez a zo mad, hag etrezoc’h, hag e‐kenver an holl.

₁₆Bezit joaus bepred. ₁₇Pedit heb ehan. ₁₈Rentit grasou en pep tra; rag kement‐se eo bolontez Doue en Jesus‐Christ en ho kenver. ₁₉Na vougit ket ar spered. ₂₀Na zisprijit ket ar profesiou. ₂₁Amprouvit an holl draou; dalc’hit stard ar pez a zo mad. ₂₂En em virit euz a bep apparans a zrouk.

₂₃Ha ra zeuio an Doue a beoc’h he‐unan, d’ho santifia holl, ha ra vezo kement a zo enoc’h, ar spered, an ene hag ar c’horf miret divlam da zonedigez hon Aotrou Jesus‐Christ! ₂₄An hini hen deuz ho kalvet, a zo fidel, hag ober a rai kement‐se.

₂₅Breudeur, pedit evidomp.

₂₆Saludit an holl vreudeur gant eur pok santel. ₂₇Me ho ped stard dre an Aotrou, ma vezo lennet al lizer‐man d’an holl vreudeur santel.

₂₈Gras hon Aotrou Jesus‐Christ ra vezo ganeoc’h! Amen.