I Corintied 6

₁Pa zigouez da unan ac’hanoc’h kaoud eun affer aenep eun all, daoust hag hen a gred hen kas da veza barnet dirag an dud difeiz, kentoc’h eged dirag ar Zent? ₂Ha na ouzoc’h‐hu ket penaos ar Zent a varno ar bed? ha mar barnit ar bed, hag indign oc’h‐hu da varn an traou distera? ₃Ha na ouzoc’h‐hu ket penaos e varnimp‐ni an elez? Kent a ze e varnimp‐ni traou ar vuez‐man! ₄Mar hoc’h euz procejou evit afferou ar vuez‐man, e kemerit evit barnerien tud hag a zo disprijet gant an Iliz! ₅Kement‐se a lavaran evit ho mêz. Daoust ha n’euz ket a dud fur en ho touez, hini e‐bed hag a helfe barna etre he vreudeur? ₆Mes eur breur hen deuz eur proces aenep he vreur, ha kement‐se dirag an dud difeiz! ₇Kaout procejou an eil a‐enep egile a zo dija eur gwall si en ho touez. Perag ne andurit‐hu ket kentoc’h e vez great gaou ouzoc’h? Perag ne andurit ket kentoc’h ar c’holl? ₈Mes c’houi hoc’h‐unan eo a ra gaou, hag a ra koll, ha c’hoas d’ho preudeur! ₉Ha na ouzoc’h‐hu ket penaos an dud injust n’ho devezo ket rouantelez Doue en heritach?

₁₀N’en em dromplit ket; nag an dud libertin, nag an idolatred, nag an avoultrerien, nag ar re en em ro d’al lubricite, nag ar sodomited, nag al laeron, nag ar re avarisius, nag ar mezverien, nag ar gwall‐deodou, nag ar re a chas ganthe ar pez n’eo ket dezhe, na heritint rouantelez Doue. ₁₁Hogen lod ac’hanoc’h a zo bet evel‐se; mes c’houi a zo bet gwalc’het, mes c’houi a zo bet santifiet, mes c’houi a zo bet justifiet en hano an Aotrou Jesus, ha dre Spered hon Doue.

₁₂Pep tra a zo permetet d’in, mes pep tra n’eo ket talvoudus; pep tra a zo permetet d’in, mes n’en em lakin esclav dindan hini. ₁₃Ar boued a zo evit ar c’hov, hag ar c’hov evit ar boued; mes Doue a zistrujo an eil hag egile. Hag ar c’horf n’eo ket great evit al libertinach, mes evit an Aotrou, hag an Aotrou evit ar c’horf. ₁₄Hogen Doue hen deuz resussitet an Aotrou, hag a resussito ive ac’hanomp‐ni dre he c’halloud. ₁₅Ha na ouzoc’h‐hu ket penaos ho corfou a zo izili ar C’hrist? Daoust eta ha me a gemero izili ar C’hrist, evit ober anezhe izili eur plac’h a vuez fall? Doue ra viro! ₁₆Petra, ha na ouzoc’h‐hu ket penaos an hini en em ro da eur plac’h a vuez fall, ne ra nemed eur c’horf assambles ganthi? Rag scrivet eo: Ho daou ne vezint nemed eur c’hig hep‐ken. ₁₇Mes an hini a zeu d’en em unani gant an Aotrou, a ra eur memeus spered assambles ganthan. ₁₈Tec’hit diouz al libertinach. Kement pec’hed all a ra an den, a zo en diaveaz euz ar c’horf; mes an hini a ra ar pec’hed hudur a bec’h aenep he gorf he‐unan. ₁₉Ha na ouzoc’h‐hu ket penaos ho corf eo templ ar Spered‐Santel, pehini a zo enoc’h, hag a zo bet roet deoc’h gant Doue, ha penaos n’oc’h ket deoc’h hoc’hunan? ₂₀rag c’houi a zo bet prenet gant eur priz braz; glorifiit eta Doue en ho corf hag en ho spered, pere a zo da Zoue.