Tchaip. IV. 4

₁Ailours Djîsus fut condut pai l’Esprit dans lou désât pou y étre tenta pai lou diâle;

₂Et peu aiprés aivoi djûnna quairante djoûes et peu quairante neux, l’eut faim.

₃Et peu lou diâle que s’aippreutcha de lu, li dit: Se vos ez l’offant de Due, fâtes que ças pîres devegnant das pains.

₄Main Djîsus li répondit: L’ost écrit: L’houmme ne vit pais ran que de pain, main de toute pairoûle que soue de lai boûetche de Due.

₅Ailours lou diâle lou transpoûetcha dans lai ville; peu lou boutant au‐desus di tempye,

₆E li dit: Se vos ez l’offant de Due, tchampâz‐vous ai bai; paiche que l’ost écrit, que l’ait ourdonna ai sas andges d’aivoi quezein de vous, et peu qu’es vos soutînrant de leux mains, de pau que vos ne couptîz vôte pie contre ne pîre.

₇Djîsus li répondit: L’ost écrit encoûe: Vos ne tenteriz pais lou Seigneu vôte Due.

₈Lou diâle lou transpoûetcha encoûe desus ne montaigne bîn hiaute; peu li montrant tous las royaumes di monde, et peu toute lai gloire que las aiccompaigne,

₉E li dit: I vos beillera tout çouqui, se vos vous boutâz ai dgenoûils pou m’aidora.

₁₀Main Djîsus li dit: Rôte‐te d’iqui, sâtan; paiche que l’ost écrit: Ç’ost lou Seigneu vôte Due que vos aidoreriz, et peu ç’ost lu seul que vos sarviriz.

₁₁Ailours lou diâle lou lâssa; et peu tout‐comptant las andges s’aippreutchennent, et peu es lou sarvînt.

₁₂Et peu quand Djîsus eut aippris qu’es aivînt bouta Djean en prison, è s’en olla en Gaililée;

₁₃Et peu aiprés que l’eut lâssie lai ville de Nâzaireth, è vînt demoûera ai Caipharnaüm, ville mairitîme su las confîns de Dzâbulon et peu de Nephthailie;

₁₄Aifîn que c’te pairoûle di prôphéte Isaïe fut aiccompyie:

₁₅Lou pays de Dzâbulon et peu lou pays de Nephthailie, lou tchemîn que condut ai lai mâ, lou pays qu’ost en delai di Djourdîn, lai Gaililée das nâtions;

₁₆Ce peupye qu’étât seta dans lai neu vut ne grand lemîre, peu lai lemîre s’ost leva desus ceux qu’étînt setas dans lai rédgion de l’ombre de lai moue.

₁₇Deu ce temps‐lai Djîsus quemença ai prôdgie, en disant: Fâtes pénitence, paiche que lou royaume di cîl ost proûetche.

₁₈Et peu voiqui que Djîsus que mairtchai tout di lon de lai mâ de Gaililée, vut doue fréres, Simon aippela Pîre et peu Aindré son frére que tchampînt leux filets dans lai mâ; paiche qu’es étînt pétcheurs;

₁₉Peu è leû dit: Seutes‐me, et peu i vos fera deveni pétcheurs d’hoummes.

₂₀Tout‐comptant es lâssennent leux filets, et peu es lou seuillennent.

₂₁In pô pus lon è vut doue autres fréres, Djâques c’tu de Zébédée, et peu Djean son frére, qu’étînt dans ne bairque aivô Zébédée leutt pére, et peu que raivaudînt leux filets. E las aippela.

₂₂Tout‐comptant es lâssennent leux filets et peu leutt pére, peu es lou seuillennent.

₂₃Peu Djîsus ollai pai toute lai Gaililée, l’înseignai dans leux synaigougues, è prôdgeai l’évaindgile di royaume, et peu voûerissai toutes las langueus et peu toutes las molaidies entremé lou peupye.

₂₄Peu sai renoûmma ollai pai toute lai Syrie, es li presentînt tous ceux qu’étînt molaides, et peu divâchement aifflidgies de maux et peu de douleus, las pôssédas, las âtrelus, las pairailitiques, et peu è las voûerissai:

₂₅Peu ne grand caima de peupye lou seuillit de lai Gaililée, de lai Décaipôle, de Djîrusâlem, de lai Djudée, et peu deu‐lai lou Djourdîn.