PSALMI SALOMONIS 7

₁Μὴ ἀποσκηνώσῃς ἀφ᾽ ἡμῶν, ὁ θεός,

ἵνα μὴ ἐπιθῶνται ἡμῖν οἳ ἐμίσησαν ἡμᾶς δωρεάν.

₂ὅτι ἀπώσω αὐτούς, ὁ θεός·

μὴ πατησάτω ὁ ποὺς αὐτῶν κληρονομίαν ἁγιάσματός σου.

₃σὺ ἐν θελήματί σου παίδευσον ἡμᾶς

καὶ μὴ δῷς ἔθνεσιν.

₄ἐὰν γὰρ ἀποστείλῃς θάνατον,

σὺ ἐντελῇ αὐτῷ περὶ ἡμῶν·

₅ὅτι σὺ ἐλεήμων

καὶ οὐκ ὀργισθήσῃ τοῦ συντελέσαι ἡμᾶς.

₆Ἐν τῷ κατασκηνοῦν τὸ ὄνομά σου ἐν μέσῳ ἡμῶν ἐλεηθησόμεθα,

καὶ οὐκ ἰσχύσει πρὸς ἡμᾶς ἔθνος.

₇ὅτι σὺ ὑπερασπιστὴς ἡμῶν,

καὶ ἡμεῖς ἐπικαλεσόμεθά σε, καὶ σὺ ἐπακούσῃ ἡμῶν.

₈ὅτι σὺ οἰκτιρήσεις τὸ γένος Ισραηλ εἰς τὸν αἰῶνα καὶ οὐκ ἀπώσῃ.

₉καὶ ἡμεῖς ὑπὸ ζυγόν σου τὸν αἰῶνα

καὶ μάστιγα παιδείας σου.

₁₀κατευθυνεῖς ἡμᾶς ἐν καιρῷ ἀντιλήψεώς σου

τοῦ ἐλεῆσαι τὸν οἶκον Ιακωβ εἰς ἡμέραν ἐν ᾗ ἐπηγγείλω αὐτοῖς.