PSALMI 19

₂Ἐπακούσαι σου κύριος ἐν ἡμέρᾳ θλίψεως,

ὑπερασπίσαι σου τὸ ὄνομα τοῦ θεοῦ Ιακωβ.

₃ἐξαποστείλαι σοι βοήθειαν ἐξ ἁγίου

καὶ ἐκ Σιων ἀντιλάβοιτό σου.

₄μνησθείη πάσης θυσίας σου

καὶ τὸ ὁλοκαύτωμά σου πιανάτω.

διάψαλμα.

₅δῴη σοι κατὰ τὴν καρδίαν σου

καὶ πᾶσαν τὴν βουλήν σου πληρώσαι.

₆ἀγαλλιασόμεθα ἐν τῷ σωτηρίῳ σου

καὶ ἐν ὀνόματι θεοῦ ἡμῶν μεγαλυνθησόμεθα.

πληρώσαι κύριος πάντα τὰ αἰτήματά σου.

₇νῦν ἔγνων ὅτι ἔσωσεν κύριος τὸν χριστὸν αὐτοῦ·

ἐπακούσεται αὐτοῦ ἐξ οὐρανοῦ ἁγίου αὐτοῦ·

ἐν δυναστείαις ἡ σωτηρία τῆς δεξιᾶς αὐτοῦ.

₈οὗτοι ἐν ἅρμασιν καὶ οὗτοι ἐν ἵπποις,

ἡμεῖς δὲ ἐν ὀνόματι κυρίου θεοῦ ἡμῶν μεγαλυνθησόμεθα.

₉αὐτοὶ συνεποδίσθησαν καὶ ἔπεσαν,

ἡμεῖς δὲ ἀνέστημεν καὶ ἀνωρθώθημεν.

₁₀κύριε, σῶσον τὸν βασιλέα σου

καὶ ἐπάκουσον ἡμῶν ἐν ᾗ ἂν ἡμέρᾳ ἐπικαλεσώμεθά σε.