PSALMI 149

Ἄισατε τῷ κυρίῳ ᾆσμα καινόν,

ἡ αἴνεσις αὐτοῦ ἐν ἐκκλησίᾳ ὁσίων.

₂εὐφρανθήτω Ισραηλ ἐπὶ τῷ ποιήσαντι αὐτόν,

καὶ υἱοὶ Σιων ἀγαλλιάσθωσαν ἐπὶ τῷ βασιλεῖ αὐτῶν·

₃αἰνεσάτωσαν τὸ ὄνομα αὐτοῦ ἐν χορῷ,

ἐν τυμπάνῳ καὶ ψαλτηρίῳ ψαλάτωσαν αὐτῷ,

₄ὅτι εὐδοκεῖ κύριος ἐν λαῷ αὐτοῦ

καὶ ὑψώσει πραεῖς ἐν σωτηρίᾳ.

₅καυχήσονται ὅσιοι ἐν δόξῃ

καὶ ἀγαλλιάσονται ἐπὶ τῶν κοιτῶν αὐτῶν·

₆αἱ ὑψώσεις τοῦ θεοῦ ἐν τῷ λάρυγγι αὐτῶν,

καὶ ῥομφαῖαι δίστομοι ἐν ταῖς χερσὶν αὐτῶν

₇τοῦ ποιῆσαι ἐκδίκησιν ἐν τοῖς ἔθνεσιν,

ἐλεγμοὺς ἐν τοῖς λαοῖς,

₈τοῦ δῆσαι τοὺς βασιλεῖς αὐτῶν ἐν πέδαις

καὶ τοὺς ἐνδόξους αὐτῶν ἐν χειροπέδαις σιδηραῖς,

₉τοῦ ποιῆσαι ἐν αὐτοῖς κρίμα ἔγγραπτον·

δόξα αὕτη ἐστὶν πᾶσι τοῖς ὁσίοις αὐτοῦ.