Titus 3

₁Mai phen lenge te muken pe pala le rai bare ai ka e kris, te patian, t'aven laše ka sa e laši butji, ₂te na den duma nasul pa khanikaste, t'aven kovle, te len pe sama, mištimasa pherde karing sa le manuš. ₃Ke vi ame, ame samas angla savořende dile, či patiasas, šibisailiam, řoburi ande sako diela kai ame kamasas ai ande o barvalimos, traisarasas ande o nasulimos ai ande so sas amenge drago, le kavre vuřitsinas ame, ai ame vuřitsisarasas len. ₄Numa, kana e dragostia le Devleski amaro Skipitori ai lesko kamimos le manušenge sikadile, ₅vo skipisardias amen, na pala le butia laše kai ame šai te kerdiam, numa pala peski mila, ande o bolimos te mai neviarel amen ai o nevo traio katar o Svinto Duxo, ₆kai vo dias pe amende pria but katar o Jesus Kristo amaro skipitori, ₇eta ke, sam dine katar e kris katar lesko mištimos, ame t'aresas kai ažiukeras, te las o traio pe sakda. ₈Kadia vorba si vorta.

Me kamav ke tu te phenes kadala dieli, eta ke kudala kai patian ande o Del te thon pe te keren laše butia. Eta so si lašio ai so trubul le manušen. ₉Numa muk le čingara dile pala le vitsi, ai le čingara, pala o zakono; ke von nai khančeske ai intaino. ₁₀Tu de tu dur, pala o mai angluno ai o duito data kai phendian leste, kudalestar kai kerel te hulaven pe le manuš, ₁₁žianes ke jekh manuš sar kudo si kurvari, ai ke kerel bezex, kai del pe strafo vo korkořo.

₁₂Kana me tradava tuke le Artemas vai le Tixiko, gribisavo t'aves mande ande o Nikopolis; ke kothe me kamav te nakhav o iven. ₁₃Le sama te des so trubul pe o drom ka o Zenas, o doxtoro le zakonosko, ai ka o Apolos. ₁₄Trubul ke vi amare manuš te sikion te keren le butia laše te den amen so trubul ame akana, eta te na aven bi-frutengi.

₁₅Sa kudala kai si mansa den tu pozdraimos. De pozdraimos kudalen kai kamen amen ande o patiamos.

Ke o mištimos te avel tumensa sa!