Romanuri 8

₁Manai akana či jekh strafo kudalenge kai si phangle ande o Jesus Kristo. ₂Čačes, o zakono katar o Duxo kai del o traio ande o Jesus Kristo šindias ma katar o zakono la bezexako ai katar e martia. ₃Ke o Del kerdias so naštil te kerel o Zakono le Mošesko, ke o kovlimos manušesko kerel te na avel les zor; o Del dias strafo e bezex ande o mas, kana tradias, pala e bezex, peske šiaves ande jekh mas jekh fialo sar o mas bezexako, ₄ai kudia ke e kris le Zakonoski te kerdiol ande amende, kai traisaras, na sar si o mas, numa sar si o Duxo. ₅Kudala, kai train sar si o mas, drago lenge le dieli le maseske, žikin kudala kai train sar si o Duxo drago lenge le dieli le Duxoske. ₆Ai e dragostia katar o mas, si o merimos, žikin e dragostia katar o Duxo, si o traio ai e patia; ₇ke e dragostia katar o mas nai laši le Devleske, ke voi či thol pe ka o zakono le Devlesko, ai voi vadžai naštil. ₈Eta kudala kai train sar si o mas naštin t'aven drago le Devleske.

₉Tumenge, tume či train sar si o mas, numa sar si o Duxo, te o Duxo le Devlesko bešel ande tumende. Te si varekon ke nai les o Duxo le Kristosko, nai lesko. ₁₀Ai t'avela o Kristo ande tumende, o stato mulo pala e bezex, numa o duxo trail pala e kris. ₁₁Ai t'avela o Duxo kudalestar kai živindisardias le Jesus maškar le mule bešel ande tumende, kudo kai živindisardias le Kristos maškar le mule dela vi o traio ande tumare staturi merimaske katar o Duxo kai bešel ande tumende.

₁₂Kadia, phralale, ame či kamas khanči le maseske, te traisaras sar si o mas. ₁₃Te traina tume sar si o mas, tume merena; numa te katar o Duxo tume mudaren le dieli bezexale anda o stato, tume traina, ₁₄ke sa kudala kai si tradine katar o Duxo le Devlesko si šiave le Devleske. ₁₅Ai tume či lian jekh duxo kai kerel tumen služi, te mai aven ande e dar; numa ame liam jekh duxo kai kerel amende šiave Devleske, katar savo ame tsipisaras le Devleske: Aba! Tate! ₁₆O Duxo vi vo si marturo ka amaro duxo ke ame sam glati le Devleske. ₁₇Eta, t'ame sam leske glati, vi si ame te las partia katar o mištimos le Devlesko ai partia le Kristosa, t'avel ke ame kjinuisaras lesa, eta t'avas vestime lesa.

₁₈Me gindi ma ke le dukha so si akana naštin te aven sar o vestimos kai sikavela amenge. ₁₉Kadia e lumia ažiukerel sar mai sigo e vramia kai o Del sikavela peske šiaven. ₂₀Ke e lumia sas thodini tela e putiaria kai či ningerel ka khanči — na anda peste, numa anda ke o Del kamlias, ažiukerimasa, ₂₁ke vi voi avela skipime katar o služimos o rimome, t'aven la partia ka o vestimos le glatengo le Devlesko. ₂₂Eta, ame žianas ke, ži ka kado dies, e lumia sa intrego vatil ai kjinuil sar le dukha katar e žiuvel. ₂₃Ai nai ke ferdi voi; numa vi ame, kai si ame le mai angluni svintsi katar o Duxo vi ame vatisaras ame ande amende, kai ažiukeras te las, te neviol amaro stato. ₂₄Ke si katar o ažiukerimos ke sam skipime. Kon ažiukerel so vuže dikhel? Eta, te dikhas so ažiukeras manai ažiukerimos. ₂₅Numa ame te ažiukeras so či dikhas, ame ažiukeras les ninkerimasa.

₂₆Sa kadia o Duxo ažutisarel ame ande amaro kovlimos, ke ame či žianas so te mangas ande amare řudjimata. Numa o Duxo vi vo mangel vatimasa so našti te phenen; ₂₇ai kudo kai dikhel ande le ile hatiarel so o svinto Duxo mangel ke vo řudjil kudalenge kai si le Devleske, sar mangel o Del.

₂₈Ame žianas, so mai si, ke o Del kerel mištimos kudalensa kai si lenge drago o Del, kudala kai si akharde sar vo kamlias. ₂₉Kudala kai o Del žianelas len angla savořende, vo šinadias len t'aven jekh fialo sar lesko Šiav ke lesko Šiav t'avel o mai angluno kai arakhadilo maškar but phral. ₃₀Ai kudalen kai vo šinadias, vo vi akhardias le; ai kudalen kai vo akhardias, vo vi kerdias len vorta angla peste; ai kudalen kai vo dias kris, vo vestisardias le.

₃₁So phenas ame kadia karing kudala dieli? Te si o Del amenge, kon šai avel pe amende? ₃₂Vo, kai či hamisailo ka pesko čačo Šiav numa kai dias les pala savoře, sar či dela ame vo sa le dieli lesa? ₃₃Kon thola doš pe le alome katar o Del? Khonik, ke o Del phenel ke von nai došale. ₃₄Kon dela len kris? o Kristo mulo — mai but, vo živindisailo, vo si pe e čači rig le Devleski, ai vo mangel amenge! ₃₅Kon šai hulavela amen katar o kamimos le Kristosko? E dukh, vai e dar, vai o kjinuimos, vai e bokh, vai o čořimos, vai o xasarimos, vai e xanřo? ₃₆Sar si ramome:

₃₇Numa ande sa kudala dieli ame mai but nirisaras kudalesa kai sam leske drago. ₃₈Ke sim siguro ke či o merimos či o traio, či le andželi či le bare čereske, či le dieli akana či le dieli kai avena, ₃₉či le zurale, či opral či telal, či jekh kaver kai arakhadilo naština te hulaven ame katar o kamimos le Devlesko sikado ande o Jesus Kristo amaro Baro.