O lil tradino ka e Khangeri ande o Sardis
1Ramosar ka e Khangeri anda o Sardis:
Eta so phenel kudo kai si les le efta duxuri le Devleske ai le efta čeřaia: Me žianav tjire butia. Me žianav ke tu nakhes sar te san živindo, ai tu san mulo. 2Le tu sama, ai zuriar so mai ašilias te merel; ke me či arakhlem tjire butia vorta angla o Del. 3De tu godji sar tu lian ai ašundian, ai garav, ai keisavo. Te na lesa tu sama, me avava sar jekh čor, ai tu či žianesa ka če časo me avava pe tute.
4Numa si tu ande o Sardis uni manuš kai či marisarde penge tsalia; von phiren mansa ande le tsalia le parne, ke von si harniči. 5Kudo kai nirila vi pe leste avena kadia le tsalia parne; me či khosava lesko anav anda e kliška le traioski, ai me puřiva lesko anav angla muřo Dad ai angle le andželi. 6Ke sako kai si les kan, t'ašunel so o Duxo phenel ka le Khangeria!
O lil tradino ka e khangeri ande e Filadelfia
7Ramosar ka o andželo katar e Khangeri anda e Filadelfia:
Eta so phenel o Svinto, o Čačo, kudo kai si les e kjeia le Davidoski, kudo kai putrel, khonik našti te phandavel, kudo kai phandavel, ai khonik našti te putrel. 8Me žianav tjire butia. Eta, sar ke si tut tsiřa zor, ai ke tu garadian muři vorba, ai ke tu či dian palpale muřo anav, me thodem angla tute jekh vudar puterdo, kai khonik naštil te phandavel les. 9Eta, me dav tu kudalen kai si ande jekh than le Satanosa, kai phenen penge Židovuri ai kai nai, numa kai xoxaven; eta, me kerava t'aven, te den čanga ka tjire punře, ai te žianen ke me kamav tu. 10Sar ke tu garadian e vorba te ninkeres ande mande, vi me garavava tu ka o časo le zumaimasko kai si t'avel pe e lumia sa, te zumaven o narodo pe e phuv.
11Me sigo si t'avav. Ninker so si tu, eta ke khonik te na lel tjiri kurona. 12Kudo kai nirila, me kerava anda leste jekh piluro ande o templo muře Devlesko, ai vo či mai anklela avri; me ramova pe leste o anav muře Devlesko, ai o anav le forosko muře Devlesko, katar o nevo Jerusalem kai vulel anda o čeri paša muřo Del, ai muřo anav nevo. 13Ke kudo kai si les kan t'ašunel so o Duxo phenel le Khangeriange.
O lil tradino ka e Khangeri ande e Laoditsea
14Ramosar ka o andželo la Khangeriako ande o Laoditsea:
Eta so phenel o Amen, o marturo čačo ai vorta, de anda o gor dekin si e lumia. 15Me žianav tjire butia. Me žianav ke tu či san či šudro či tato! Mai mišto t'aves tu šudro vai tato! 16Kadia, sar ke tu san kropo, ai ke tu či san či šudro či tato, me šiadava tu anda muřo mui. 17Sar ke tu phenes: Me sim barvalo, me barvailem, ai man či trubul ma khanči, ai ke tu či žianes ke tu san nasul, nekežime, čořo, kořo ai nango. 18Me sikiarav tu te kjines mandar sunakai zumado katar e jag, eta t'areses barvalo, ai tsalia parne, eta t'aves uriado ai ke o lažiav tjire nangimasko te na dikhiol, ai jekh drab te makhes tjire jakha, eta te dikhes.
19Me, sikiarav ai marav sa kudalen kai si mange drago. Av harniko, ai keisavo. 20Eta, me ninkerav ma angla o vudar, ai me malavav. Te si varekon ke ašunel muřo hango ai putrel o vudar, me dava andre leste, me xava lesa, ai vo mansa.
21Kudo kai nirila, me kerava te bešel mansa pe muřo skamin amperatisko, sar me nirisardem ai me bešav muře Dadesa pe lesko skamin amperatisko. 22Ke kudo kai si les kan, t'ašunel mišto so o Duxo phenel le Khangeriange.
