Sikavimos 1

₁Ande kadia kliška si ramome le dieli kai o Kristo phendias peske slugenge kai si t'aven, ai kai vo kerdias te žianel peski sluga o Jono, kana tradias leske peske andželos. ₂Kudo si e vorba le Devleski ai o čačimos sikavdo katar o Jesus Kristo, sa sogodi o Jono dikhlias. ₃Veselo kudo kai gjinel ai kudala kai ašunen le vorbi katar so si t'avel, ai kai garaven le dieli kai si ramome! Ke e vramia si paše.

ke o mištimos ai e patia t'aven tumenge dine katar kudalo kai si, kai sas, ai kai avel, ai katar e partia le efta duxongi kai si angla lesko skamin amperatisko, ₅ai katar o Jesus Kristo, o čačo marturo, o mai angluno arakhado anda le mule, ai o prinso le amperatongo la phuviake!

Kudaleske kai kamel amen, kai skipisardias amen anda amare bezexa katar pesko rat, ₆ai kai kerdias anda amende jekh amperetsia, raša le Devleske leske Dadeske, leske t'aven o vestimos ai e zor, berš beršestar. Amen!

₇Eta, vo avel le nuveronsa, ai sako jakh dikhela les, inke kudala kai pusade les; ai sa le kumpani la phuviake vatina pe pala leste. Ei, Amen!

₈Me sim o mai angluno ai o mai paluno, phenel o Baro o Del, kudo kai avel, o Mai Zuralo.

₉Me o Jono, tumaro phral, ai kai si les partia tumensa ka o kjinuimos ai e amperetsia ai o ažiukerimos ande o Jesus, me simas ande e inzula kai akharen la Patmos, pala e vorba le Devleski ai o čačimos sikavdo katar o Jesus. ₁₀Me simas lino ande o Duxo o dies le Baresko, ai me ašundem pala mande jekh hango zuralo, sar o bašimos jekha tuturiazako, ₁₁kai phenelas: So tu dikhes, ramosar les ande jekh kliška, ai trade les ka le efta Khangeria, ka o Efeso, ka e Smirna, ka o Pergamo, ka o Tiatira, ka o Sardis, ka e Filadelfia, ai ka o Laoditsea.

₁₂Me amboldem ma te prinžiarav savo si kudo hango kai delas mansa duma. Ai, pala ke amboldisailem, me dikhlem efta lampuri sunakune, ₁₃ai, maškar le efta lampuri, varekon kai miazolas sar jekh šiav manušesko, uriado ande jekh lungo řotia, ai sas les jekh prastia sunakuni pe o kolin. ₁₄Lesko šero ai leske bal sas parne sar e pošom e parni, sar o iv; leske jakha sas sar jekh pařa jagaki; ₁₅leske punře sas jekh fialo sar o abčin phabardo, sar t'avilinosas dino jag ande jekh bov; ai lesko hango sas sar o bašimos le bare paiengo. ₁₆Sas les ande lesko vast o čačo efta čeřaia. Anda lesko mui anklelas avri jekh xanřo skutsome, kai šinel pa le dui riga; ai leski fatsa sas sar o kham kana strefial ande sa peski zor.

₁₇Kana me dikhlem les, me pelem ka leske punře sar mulo. Vo thodias pe mande pesko vast o čačo, phenelas: Na dara! Me sim o mai angluno ai o mai paluno, ₁₈ai o živindo. Me simas mulo; ai eta, me sim živindo pe le berš beršeste. Me si ma e putiaria pe o merimos ai pe e lumia le mulengi.

₁₉Ramosar kadia tu le dieli kai tu dikhlian, ai kudala kai si, ai kudala kai si t'aven pala lende, ₂₀e čudenia katar le efta čeřaia kai tu dikhlian ande muřo vast o čačo, ai katar le efta lampuri sunakune. Le efta čeřaia si le andželi katar le efta Khangeria, ai le efta lampuri si le efta Khangeria.