1Psalmo
Gjilaben le Bare Devleske jekh gjili nevi!
Ke vo kerdias šodo dieli.
Lesko čačo vast, lesko svinto vast avile t'ažutin les.
2O Baro Del sikadias pesko skipimos,
Vo sikadias peski kris ka le jakha le themenge.
3Vo dias pe godji ka pesko mištimos ai pesko čačimos karing o kher anda o Israel,
Sa le gora la lumiake dikhle o skipimos amare Devlesko.
4Phurden karing o Baro Del tsipimata veseli,
Tume sa, narodo la phuviako!
Keren te phařadiol tumari veselia, ai gjilaben!
5Gjilaben le Devleske la tsiturasa;
La tsiturasa gjilaben gjili!
6Le tuturiazensa ai o bašimos la tuturiazako,
Phurden tsipimos veseli angla o amperato, o Baro Del!
7Ke vuřil e maria sa kudalensa kai si ande late,
Ke e lumia ai kudala kai bešen pe late phařadion dragostar,
8Ke le paia te maren palmi,
Ke sa le plaia te phurden tsipimata veseli,
9Angla o Baro Del! Ke vo avel te del kris le phuvia;
Vo dela kris la lumia zakonosa,
Ai le narodon čačimasa.
