1Gjilaben le Bare Devleske jekh gjili nevi!
Gjilaben le Bare Devleske, tume sa, narodo la phuviako!
2Gjilaben le Bare Devleske, svintsime lesko anav,
Phenen dies diesestar lesko skipimos!
3Phenen maškar le thema lesko vestimos,
Maškar sa le naroduri leske šukarimata!
4Ke o Baro Del si baro ai šai luvudin les,
Vo si zuralo opral sa le dela;
5Ke sa le dela le narodonge si xoxamne dela,
Ai o Baro Del kerdias le čeri.
6O šukarimos ai o barimos si angla leski fatsa,
O vestimos ai e amperetsia si ande leske svinto than.
7Famili le narodoske, den ka o Baro Del,
Den ka o Baro Del vestimos ai pativ!
8Den ka o Baro Del vestimos pe lesko anav!
Anen podarki, ai den andre ande leske baria!
9Klonin tume angla o Baro Del! le dielensa svintsime.
Isdran angla leste, tume sa, narodo la phuviako!
10Phenen maškar le thema: O Baro Del amperetsil;
Kadia e lumia si zurali, vo či miškil;
O Baro Del del kris le narodon čačimasa.
11Ke le čeri veselin pe, ai ke te e phuv t'avel veseli,
Ke te e maria bašel ai sogodi si ande late,
12Ke e kumpania veselil pe sogodi si phangle lasa,
Ke te sa le kopačia le vešenge phurden tsipimos veselo,
13Angla o Baro Del! Ke vo avel,
Ke vo avel te del kris la phuvia,
Ai le naroduri sar si lenge čačimos.
