1Řudjimos katar o Moše, manuš Devlesko.
Baria! tu sanas mange jekh kai garadiovav,
Vitsa vitsatar.
2Angla savořende ke te le plaia arakhadion,
Ai ke kai tu kerdian e phuv ai e lumia,
Berša beršensa tu san Del.
3Tu keres te žian le manuš ande kišai,
Ai tu phenes: Šiav katar o manuš, žia palpale.
4Ke jekh mia berš si, ka tjire jakha,
Sar o dies aratji, kana manai,
Ai sar te les sama e riate.
5Tu ningeres le, jekh fialo sar jekh suno,
Kai, diminiats, nakhel sar e čar:
6Voi luludiol diminiats, ai voi nakhel,
Šinen la e riate, ai voi šukiol.
7Ame sam phabarde katar tjiri xoli,
Ai tjiri xoli daravel ame.
8Tu thos angla amende amare bezexa,
Ai ka e vedaria tjira fatsaki amare doša garade.
9Sa amare diesa bilan katar tjiri xoli;
Ame dikhas ke amare berša bilan sar jekh bašimos.
10Le diesa amare beršenge žian eftavar deš berš,
Ai, ka le mai zurale, oxto-var-deš berš;
Ai o barimos kai von tsirden si nekazo ai kjino,
Ke nakhel sigo, ai ame vurias.
11Kon lel sama kai e zor tjira xoliaki,
Ai ka tjiri xoli, sar si t'avel tutar dar?
12Sikiar ame te gjinas mišto amare dies,
Eta te thas amaro ilo sar tu sikiares ame.
13Aidi, Baro Del! Ži kana?
T'avel tuke mila katar tjire slugi!
14Pravar ame sako diminiats tjire dragostosa,
Ai ame avasa sa amaro veko ande e veselia ai o veselimos.
15Veselisar ame kaiti diesa sode tu dian ame tele,
Kaiti berš sode ame dikhliam nekazo.
16Ke te tjiri butji sikavel pe ka tjire slugi,
Ai tjiro vestimos pe lenge šiave!
17Ke o šukarimos le Bare Devlesko, amaro Del, t'avel pe amende!
Zuriar e butji amare vastenge!
