Psalmo 88

₂Baro Del, Del muře skipimosko!

Me tsipiv diese ai riate angla tute.

₃Ke te muřo řudjimos t'avel angla tute!

Tho o kan ka me so mangav!

₄Ke muřo duxo čailo ho dukhasa,

Ai muřo traio pašiol kai bešen le mule.

₅Me sim ande o řindo kudalengo kai vulen ande e groapa,

Me sim sar jekh manuš kai manai les zor.

₆Me pelem maškar le mule,

Jekh fialo sar kudala kai si mudarde ai kai soven ande o groapoševo,

Ka kudala kai či mai des tu godji lende,

Ai kai si hulade anda tjiro vast.

₇Tu šiudian ma ande jekh bari groapa,

Ande le tuniariči, ande le uni.

₈Tjiri xoli phariol pe mande,

Ai tu mardian ma sa le paiensa tjire.

₉Tu duriardian mandar muře vortačon,

Tu kerdian me t'avav lenge jekh griatsia;

Me sim phandardo ai naštiv t'ankliav.

₁₀Muře jakha bilan ande e dukh.

Me akharav tu sako dies, o Baro Del!

Vazdav karing tute le vast.

₁₁Si le mulenge ke tu keres čudeni?

Le mule ušten von te luvudin tu?

₁₂Den duma pa tjiri dragostia ande o groapoševo,

Pa tjiro čačimos ande le uni?

₁₃Tjire dieli šodo žianen le von ande le tuniariči,

Ai tjiri kris ande e phuv kai si busterdi?

₁₄O Baro Del! me mangav tu t'ažutis ma,

Ai diminiats muřo řudjimos uštel tute.

₁₅Sostar, Baro Del, des tu palpale muřo duxo?

Sostar garaves tu tjiri fatsa?

₁₆Me sim nekežime ai merimasko de terniara,

Pe mande si tjire dara, rimosailem.

₁₇Tjire xolia nakhen pe mande,

Tjire dara mudaren ma;

₁₈Von terdion krugom ma sako dies sar le paia,

Von terdion krugom ma sa anda jekh data.

₁₉Tu duriardian mandar vortača kai sas mange drago;

muře mai paše manai.