1Gjili. Psalmo le Asafoske.
2O Del na beš te na keres khanči!
Na aš, ai na hodinisar, o Del!
3Ke eta, tjire dušmaia miškin pe,
Kudala kai vuřitsin tu vazden o šero.
4Von den pe godji pe tjiro narodo ginduri pherde xitreni,
Ai von den pe duma pe kudala kai tu les sama lendar.
5Aven, phenen von, bilavas le maškar le thema,
Ai te bustras o anav o Israel!
6Von den pe godji sa ande jekh ilo, Von kerde jekh patia pe tute;
7Le tseři anda o Edom ai le Išmaelituri,
O Moab ai le Hagarenuri,
8Gebal, Amon, Amalek,
Le Filistanuri le narodosa anda e Tira;
9Vi e Asiria žial lensa,
Voi del pesko vast ka le glati katar o Lot.
10Ker anda lenge sar anda o Midian,
Sar o Sisera, sar o Jabin ka o paiořo o Kišon!
11Von sas phařade ande o En-Dor,
Von aresle gosni la phuviake.
12Ker anda lenge birevia sar o Oreb ai Zeb,
Ai sa lenge prinsuria sar Zebax ai Tsalmuna!
13Ke von phende: Las amenge so si le Devlesko!
14Muřo Del! ker anda lende sar turberia,
O khas kai ningerel e balval,
15E jag kai phabarel o veš,
Ka e pařa kai del jag le plaia!
16Naš pala lende ande tjiro tumano,
Ai ker te isdran katar tjiro baro tumano!
17Tho lažiav pe lengi fatsa,
Eta te roden tjiro anav, o Baro Del!
18T'aven tele ai te daran pe sakda,
Ke te aven lažiavarde ai te xasavon!
19Ke te žianen ke ferdi tu, kai o anav si o Baro Del,
Tu san o Mai Vučo pe sa e phuv!
