Psalmo 73

E, o Del si lašio te ažutil o Israel,

Kudalenge kai si le o ilo vužio.

₂Numa, muřo punřo sas te perel,

muře pasuri mai tsiřa te den rigate;

₃Ke me kamavas te kerav sar le dile,

Kana dikhavas e veselia le nasulengi.

₄Khanči či rimol le ži ka o merimos,

Ai pe lengo stato si thulimos;

₅Nai len či jekh partia ka e dukh le manušenge,

Von nai malade sar le kaver manuš.

₆Kadia le barimata terdion krugom len sar lanso kořako,

O zuralimos si le tsalia pe lende;

₇E bezex anklel anda lenge peřa,

Le ginduri anda lengo ilo sikadiol ka o dies.

₈Von maren mui, ai den duma nasul te den opral;

Von phenen divanuri barimatange,

₉Von vazden pengo mui ži ka le čeri,

Ai lengi šib phiravel-pe pe e phuv.

₁₀Eta sostar lesko narodo amboldel-pe pe leski rig,

Vo nakhavel o pai but,

₁₁Ai vo phenel: Sar o Del žianela,

Sar o Mai Vučo žianela vo?

₁₂Kadia si le nasul:

Sakda veseli, von butiaren penge barvalimos.

₁₃Intaino me vužardem muřo ilo,

Ai ke me xaladem muře vaš ande so nai doš:

₁₄Sako dies sim malado,

Sako diminiats muřo kjino Si kothe.

₁₅Te phenava me: Kamav te dav duma sar lende,

Eta, bikjinava e vitsa tjire glatengi.

₁₆Kana dav ma godji pe kudia te šai hatiarav,

Trudno si angla muře jakha,

₁₇Žikin či aresav ande o svinto than le Devlesko,

Ai ke te lav sama so aresel ande o gor le nasulengo.

₁₈E, tu thos le pe e vurma kai peren,

Tu keres le te peren pe o xamos rimome.

₁₉Ande so! ande jekh vramia eta le phařade!

Von si line, mudarde anda jekh data!

₂₀Sar jekh suno kana uštes,

Baria, kana ku uštes, tu des palpale lenge ginduri.

₂₁Kana muřo ilo vuřitsilas pe,

Ai ke hatiaravas ma šindo ande le peřa,

₂₂Me simas dilo ai bi godiako,

Me simas karing tute sar le žigeni.

₂₃Numa me sim sakda tusa,

Tu lian muřo vast o čačo;

₂₄Tu ningeres ma sikiarimasa,

Porme tu lesa ma ande tjiro vestimos.

₂₅Kon avela ma ande o čeri ke ferdi tu?

Ai pe e phuv si mange ferdi drago ande tute.

₂₆Muřo mas ai muřo ilo šai bilan:

O Del avela sakda o bař muře ilesko ai muřo hulaimos.

₂₇Ke eta, kudala kai durion tutar xasavon;

Tu phařaves kudalen kai nai tusa čače.

₂₈Mange, pašiuvav ka o Del, si muřo mištimos:

Me garadiovav ande o Baro, o Baro Del,

Eta t'arakhav sa tjire butia.