Psalmo 59

₂Muřo Del! skipisar ma katar muře dušmaia,

Le sama mandar katar muře dušmaia!

₃Skipisar ma katar le šion,

Ai skipisar ma katar le manuš rateske!

₄Ke eta, von garadion te len mandar o traio;

Manuš nasul den pe duma pe mande,

Bi t'avav došalo, bi te kerdem bezex, o Baro Del!

₅Makar ke či sim došalo, von našen, von lašiardion;

Ušti, aidi angla mande, ai dikh!

₆Tu, Baro Del, o Del le řaioske zurale, Del ande o Israel

Ušti te mares sa le themen!

Te na avel tuke mila anda či jekh anda kudala nasul kai či patian!

₇Von aven sako riat, von bašen sar le žiukel,

Von terdion krugom o foro.

₈Eta, anda lengo mui šiuden o nasulimos,

Xanře si pe lenge vuš;

Ke, so ašunen von?

₉Ai tu, Baro Del, tu asas lendar,

Tu mares mui katar sa le thema.

₁₀So avela lengi zor, ande tute me ažiukerav,

Ke o Del si muřo baro than opre kai garadiovav.

₁₁Muřo Del avel angla mande ande pesko mištimos,

O Del kerel te dikhav veselimasa kudalen kai maren ma.

₁₂Na mudar le, daratar ke muřo narodo bustrel le;

Ker te phiren katar tjiri zor, ai šiude le,

Baria, amaro fedevo!

₁₃Lengo mui kerel bezex katar sako vorba anda lengo vuš:

Ke t'aven von line ande pengo barimata! Von phenen ferdi armaia ai xoxaimos.

₁₄Phag le, ande tjiri xoli, phag le, ai von te na mai aven!

Ke te žianen ke o Del amperetsil pe o Jakob,

Ži ka le gora la lumiake.

₁₅Von aven sako riat, von bašen sar le žiukel,

Von terdion krugom o foro.

₁₆Von roden katka kothe, roden pengo xamos,

Ai von nakhen e riat bi t'aven pravarde.

₁₇Ai me, me gjilabav tjiri zor;

De diminiats, me vestiv tjiro mištimos.

Ke tu san mange jekh baro than kai garadiovav,

Jekh kai garadiovav o dies kai si nekazo.

₁₈O muři zor! tut vestiva tu,

Ke o Del, muřo Del si lašio, si jekh baro than kai garadiovav.