Psalmo 51

₃O Del! t'avel tuke mila mandar ande tjiro lašimos;

San si tjiri bari mila, khos muře bezexa;

₄Xalav ma sa katar muři bezex,

Ai vužar ma anda muře dilimata.

₅Ke me žianav ke dem po lažiav,

Ai muři bezex si sakda angla mande.

₆Me kerdem ferdi pe tute bezex,

Ai me kerdem so si nasul ka tjire jakha,

Kadia ke tu avesa arakhado vorta ande so phenesa,

Te bešes čačo ande tjiri kris.

₇Eta, me arakhadilem ande e bezex,

Ai muři dei kerdias ma ande e bezex.

₈Numa tu kames ke o čačimos t'avel ande o fundo le ilesko:

Ken t'avel e godji ande mande andre!

₉Vužar ma le hisoposa, ai me avava vužio;

Xalav ma, ai me avava mai parno san o iv.

₁₀Phen mange o veselimos ai e veselia,

Ai le kokala kai tu phaglian veselina pe.

₁₁De rigate tjire jakha katar muře bezexa,

Khos sa muře bezexa.

₁₂O Del! ker ande mande jekh ilo vužio,

Neviar ande mande jekh duxo mišto thodo.

₁₃Na šiude ma dun katar tjiri fatsa,

Na le mandar tjiro svinto duxo.

₁₄De ma e veselia tjiri skipimaski,

Ai ke jekh duxo lašio te ninkerel ma!

₁₅Me sikiarava tjire vurmi kudalenge kai den le palpale,

Ai le bezexale avena tute.

₁₆O Del, o Del katar muřo skipimos! skipisar ma katar o rat dino muial,

Ai muři šib vestila tjiri mila.

₁₇Baria! puter mire vuš,

Ai muřo mui phenela tjiro vestimos.

₁₈Te tu kamlianas sakrifisuri,

Me demas le tuke;

Numa tuke nai drago le phabarimata.

₁₉Le sakrifisuri kai si drago le Devleske, si jekh duxo phago:

O Del! tu či šiudes jekh ilo phago ai bango.

₂₀Dikh katar tjiro šukarimos tjiro mištimos pe o Sion,

Vazde le ziduri katar o Jerusalem!

₂₁Atunči, tu lesa le sakrifisuri la krisake,

Phabarimata ai sa so si šinade intrego;

Atunči dena guruva pe tjiro altari.