1Le Davidoske. Kana kerdias pe sar dilo angla o Abimelek, ai ke gelotar dino avri lestar.
2Me svintsova le Bare Devles ande sa e vramia;
Lesko řudjimos avela sakda ande muřo mui.
3Ke muřo duxo te vestil pe ande o Baro Del!
Ke le čoře ašunen ai te veselin pe!
4Bariaren mansa le Bare Devles!
Vestisaren sa lesko anav!
5Me rodem le Bare Devles, ai dias ma anglal;
Vo skipisardias ma anda sa muře darimata.
6Kana ambolden karing leste le dikhimata, strefial veselimasa,
Ai lengo mui nas lažiavardo.
7Kana jekh čořo tsipil, o Baro Del ašunel,
Ai vo skipil les anda sa peske nekazuri.
8O andželo le Bare Devlesko del vatra krugom kudala kai daran,
Ai vo ankalavel le anda e beda.
9Šungan ai dikhen sode o Baro Del si lašio!
Veselo o manuš kai rodel ande leste te garadiol!
10Daran katar o Baro Del, tume leske svintsi!
Ke khanči či mai trubul kudalen kai daran.
11Le lionutsuri zumaven ke nai le khanči ai si bokhale,
Numa kudalenge kai roden le Bare Devles avela sa o mištimos kai kamen.
12Aven, muře šiave, ašunen mande!
Me sikiarava tumen e dar katar o Baro Del.
13Kon si o manuš kai si leske drago o traio,
Kai kamel te lungiarel les te veselil pe mišto?
14Le sama tjiri šib katar o nasul,
Ai tjire vuš katar le vorbi kai athaven;
15Žia dun katar o nasul, ai ker mištimos;
Rode ai žia pala e patia.
16Le jakha le Bare Devleske si pe le vorta,
Ai leske kan ašunen lenge tsipimata.
17O Baro Del amboldel peski fatsa katar le nasul,
Te šinel pa e phuv lengo gindo.
18Kana le vorta tsipin, o Baro Del ašunel,
Ai vo skipil le anda sa lenge nekazuni;
19O Baro Del si paša kudala kai si lengo ilo šindo,
Ai skipil kudalen kai si lengo duxo pelo tele.
20O nekazo perel butivar pe o vorta,
Numa o Baro Del skipil les sakda.
21Vo arakhel sa leske kokala,
Či jekh anda lende nai phage.
22O nasulimos mudarel le nasules,
Ai le dušmaia katar o vorta si mande.
23O Baro Del skipil o duxo peske slugenge,
Ai sa kudala kai garadion leste či mai pokjinena.
